Ko e Fili Vahega Tagata mo e Lotu

HE HOKO ai au ke he U.S. he tau 1978, ne manamanatu au kua leva tuai e tuku kehe he tau lekua fili vahega tagata i Amerika, ko e tatai oti e tau tagata uli mo e he motu,” he talahau e Mark Mathabane, ko e tagata tohia fanau mai i Aferika Toga, he tutala mo e mekasini Time. “He tau puhala loga, ne kitia e au kua moli e mena ia. Kua tuga e malikiti ki mua e tau teau tau he U.S. ki a Aferika Toga. Ati ofo au, he kitia, kua nakala lahi e mena ne hiki he tau loto he tau tagata.” Ko e heigoa ne fakahoko e fakailoaaga ofo ia ki a ia?

“Ko e taha magaaho ne fefakavahegaaki e tau tagata i Amerika ko e hola 11 a.m. he Aho Tapu,” he talahau e Mathabane. Mailoga e ia pete ni ha he tapu, aila maeke agaia e tau tagata ke fakafetui mo e tapuaki mo lautolu he taha vahega tagata. “Fefe la e logonaaga ha lautolu he falu atu aho he fahitapu?” he huhu e ia. He ui ai ke fakaohooho e fakaakoaga ma e hikihikiaga, ne pehe a Mathabane: “Mo e fakaakoaga kua maeke ia koe ke talia e tataiaga he tau tagata oti.”

Talia he Tau Fakamoli a Iehova e lataaga he fakaakoaga, ka e fakamahomo atu e lautolu e fakaakoaga ne fakave ke he Kupu he Atua. E, ne lagomatai he Tohi Tapu a lautolu ke fakamalolo hifo e tau pa fili tagata ke he fili vahega tagata​—pihia foki he tau motu ne holoholo noa e fakavihiatia ke he matakau kehe. He tau fahitapu takitaha he tau Fale he Kautu ha lautolu, ne fakapotopoto auloa e tau vahega tagata mo e tau motu kehekehe ke ako he tau fakatufono mo e tau poakiaga he Kupu he Atua, ko e Tohi Tapu. Nakai fai oko tupe ka taute he tau feleveiaaga nei. Kua fakafeleveia atu a koe ke hau!