Mafola e Lalolagi—Fefe?
KUA hoko kia e vaha mafola ke he lalolagi? Kua tokologa ne manatu pihia he magaaho fakamua ka e fakauaua lahi he mogonei. Tuga e tohitala ne tutala ke he tau paleko hagaao ki a tautolu anoiha, ne lomi he Daily Mail & Guardian i Aferika Toga, ko e “tau talahau tuai ne hagahaga atu ke he taha fakatokatokaaga fou he lalolagi katoa ne taute he 10 e tau tau nukua mole ka e mogonei kua tuga ko e taofiaga amaamanaki mitaki tunoa.”
Kua manamanatu e tau tagata tohia ke he agaga amaamanaki ne tupu he tau hogofulu tau noa ne mole. Kua fakaoti laia e Felakutaki Taufetului, ti galo noa e totoko he tau pule malolo. He magaaho ne liga maataata mai e vaha fou, tokologa ne piko to ukufeke e tau tagata ke gahuahua fakalahi ke holoholo kehe e tuaga nofogati, tau gagao, mo e tau lekua takatakaimotu. “Tuga anei kua teao noa e tau amaamanakiaga talahau tuai ia,” he talahau he tohitala. “Kua mafuta hake e tau lekua fou he tau kalakala ne nakai kiki kia mautolu; ti holo atu e tupu lahi he nofogati ke he lalolagi. Mo e ha ha ai ua e pule malolo niukilia fou. Ti kua lau kelea e talahaua he UN ha ko e hana fakateaga ke he tau matematekelea loga ne tutupu ke he tau tagata. Ti hiki tuai e logonaaga he amaamanakiaga monuina ke he amaamanakiaga matakutaku.”
Ne mailoga he tau tagata ako Tohi Tapu ko e laliaga he tau tagata, pete kua tonu, to nakai fakaai ke kautu katoatoa. Ko e ha? Ha kua talahau he Tohi Tapu, “ko e lalolagi oti ha he pule hana kua mahani kelea.” (1 Ioane 5:19) I lalo hifo he pule a Satani, to nakai fakaai e lalolagi ke hoko ke he tuaga Parataiso ne tufuga tuai he Atua.
Ka e he magaaho taha ia, ha ha i ai e fakaveaga ma e amaamanakiaga. Nukua mavehe tuai e Iehova ko e Atua e fakamafolaaga ma e lalolagi, ke nakai fonofono e fakatokatokaaga nei, ka e he fakatu hake e “lalolagi fou” ne “nofo ai e tututonu.” (2 Peteru 3:13) E, he kakano he Kautu he Atua, to fakafaliu e lalolagi ha tautolu ke he kaina monuina mo e fiafia, ne ha ha i ai e olioli tumau he moui mo e he gahua ma e tau tagata omaoma katoa. Lafi atu, kua mavehe tuai e Atua ke ‘holoholo kehe e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.’ Nakai fakave e tau maveheaga nei ke he tau talahau maueue tuai he tau tagata. Nakai, ka e fakave ke he Kupu tonuhia he Tufuga, ne kua nakai maeke ke pikopiko.—Fakakiteaga 21:4; Tito 1:2.