Lata Kia a Mutolu ke Nonofo Fakahanoa?

TOKOLOGA e tau tagata kua talia ko e mena mahuiga lahi a ia kaeke kua mailoga ko lautolu ko e tagata mahani totonu, nofo fakatekiteki, mahani molu, po ke fakamanava lahi. Ka e, ha i ai e taha fahi ke he mahani totonu. Kua talahau e Tohi Tapu: “Ko e nonofo fakahanoa he tau tagata goagoa ke mahaikava ai a lautolu.” (Tau Fakatai 1:32) Ko e heigoa e kakano he mena ia?

Kua liliu he falu a liliuaga Tohi Tapu e kupu Heperu fakamua aki e tau kupu tuga e “fakateao noa” (American Standard Version), “fakatokoluga” (The New American Bible), mo e “fakateaga.” (The New English Bible) Ko e kakano nei, kua matutaki e mahani fakahanoa ke he aga teva mo e nofo fakateao ati lauia ai ke taute mena fakagoagoa po ke nakai iloilo.

He senetenari fakamua, tuga kua nonofo fakahanoa po ke fakateaga e tau Kerisiano he fakapotopotoaga i Laotikaia ke he tau lolelole fakaagaga ha lautolu. Ne hula fakatokoluga a lautolu kua “nakai nofogati foki au he taha mena taha.” Ka e fakatonu age e Iesu Keriso ki a lautolu, kia liu fakafou e eketaha faka-Kerisiano ha lautolu.—Fakakiteaga 3:14-19.

Kua nonofo fakahanoa foki e tau tagata he vaha a Noa. Nukua lavelave lahi a lautolu mo e tau mena fakalalolagi ke lauia ai e moui, “ne kai a lautolu mo e inu, ti fai hoana a lautolu mo e fakafaitane . . . , ti nakai iloa e lautolu ato hoko mai e fakapuke, mo e uta kehe a lautolu oti.” Ati lafi atu e Iesu: “To pihia foki ka hau e Tama he tagata.”—Mataio 24:37-39.

Ko e fakamoliaga he tau perofetaaga he Tohi Tapu ne fakakite kua nonofo a tautolu he vaha “ka hau e Tama he tagata,” ko Iesu Keriso. Ti aua nonofo fakateao noa, fakateaga, mo e fakatokoluga a tautolu—ko e nonofo fakahanoa fakahehe.—Luka 21:29-36.