Ko e Tohi ki a Noa

“KI A Noa, kua lagaloga ne totou e au i loto he Tohi Tapu hagaao ki a koe mo e puhala ne talaga aki e koe e vaka ti maeke ke fakahao a koe mo e hau a magafaoa he Fakapuke.”

Kamata pihia e tohi he tama fifine 15 tau he moui ne higoa ko Minnamaria ne hu he tohi tala fetoko ma e tau fanau aoga ne 14 ke he 21 e tau tau. Ko e fetoko kua fakatoka he matakau fale tohi i Finilani, ko e Federation for Finnish Mother Tongue Teachers, mo e Finnish Literature Society. Ko lautolu ne huhu he tohi tala fetoko kua lata ke tohi e tohi he fakamatapatu ke he pepa. Kua liga ke hagaao e tohi ke he tagata ne tohia po ke tagata i loto he pepa. Kua fifili he tau faiaoga molea e 1,400 e tau tohi mai he tau fanau aoga ha lautolu mo e ta atu ai ke he matakau tivi tohi tala fetoko. Ko e matakau tivi he magaaho ia ka fifili e tohi ne tu taha, fufuta hogofulu ke uaaki ne mua atu, mo e fufuta hogofulu ke toluaki he tau esei ne mua atu. Ne fiafia a Minnamaria ha kua tu he fufuta tolu e tohi hana.

Ko e ha a Minnamaria, ko e tama aoga fuata tote, ne tohia e tohi hana ki a Noa, ko e tagata ne moui kavi ke he 5,000 he tau tau kua mole? Ne pehe a ia: “Ko e Tohi Tapu ko e mena fakamua ne hau ke he manamanatuaga haku. Kua mahani lahi au ke he tau tagata i loto he Tohi Tapu. Kua lahi mahaki e totou haku ki a lautolu ti tuga kua teitei momoui a lautolu ki a au. Ne fifili e au a Noa kakano ha kua fulufuluola lahi hana moui mo e kehe mai he haku.”

Ko e tohi ha Minnamaria ki a Noa kua fakaoti aki e tau kupu: “Kua tumau agaia ni a koe ko e fakafifitakiaga he tua mo e omaoma. Kua fakamalolo he moui hau a lautolu oti ne totou e Tohi Tapu ke gahua ke he tua ha lautolu.”

Ko e tohi nei he tagata tote totou Tohi Tapu kua fakatata fakamitaki kua moli ko e Tohi Tapu “kua moui ia, mo e gahua malolo” ke he tau tagata, lautolu ne fuata mo e fuakau.​—Heperu 4:12.