Matematekelea Tupu Fakaofo

KO OWEN, ko e tama tane ua mo e hafa e tau he moui, ne fefeua he fale koukou he kaina hana. Ne toli hake a ia ke he puha tegavai ne manatu e tau matua hana kua nakai hoko a ia ki ai. I loto he puha, ne moua e ia e lupo ne futia ki a ia. Ne hafagi e ia mo e inu ai. Matematekelea tupu fakaofo.

Ne ha ha he lupo e asita vevela, momoko ai, ne mate a Owen. Ne loto malipilipi e tau matua hana. Ko Percy, ko e matua tane hana, ne kumi mafanatia mai he lotu hana. “Ko e ha ne tupu e mena nei?” he huhu e ia. Ne tali e akoako, “Manako foki e Atua ke he taha agelu tote he lagi.” Mamahi lahi mahaki, kua logona he tau matua maanu ne nakai fai fakafili tonu e mena nei. Kua pulega moli kia e Atua to tupu e matematekelea pihia? Hogohogomanava ai, ne nakai liu a Percy he tapu.

He manamanatu ke he mena ne tupu, ne tuaha a Percy: ‘Kua mamahi agaia kia e tama tane tote haku? To liu nakai au ke kitia a ia?’

To tuaha foki a koe ke he mena ka tupu he magaaho ka mate mo e maeke nakai ke liu fakalataha anoiha mo e tau fakahele ne mamate. Kua tali he Kupu he Atua, ko e Tohi Tapu e tau huhu nei. Kua ha ha he Tohi Tapu e tau tali maama mo e mafanatia ma e tau tagata oti ne felauaki mo e tau matematekelea pihia. Mua atu ai, kua fakakite mai e monuina mua ue atu ne mavehe he Atua—ko e liu tu mai.

Fakamolemole totou e vala tala ka mui mai ke iloa atu foki hagaao ke he amaamanakiaga mua ue atu nei.