Ko e Ahiahi Atu ne Fakatupue Hikiaga

“AI MAEKE au ke fakatali ke tala age ke he magafaoa haaku hagaao ke he ua e ‘agelu’ ne fakafano mai he Atua ki a au.” Pihia he tohi he tagata taane ne tokoua e fifine ko e Tau Fakamoli a Iehova ne aahi atu ki a ia. He tau faahi tapu gahoa ato aahi atu a laua, ne mate e hoana haana ne 45 e tau he mau a laua. Ne malipilipi e loto haana. Ne fakamafana he tau fanau lalahi haana a ia, ka kua nonofo mamao a lautolu. Ne nakai fai kapitiga po ke tuuta kaina ne aahi atu ki a ia.

“Nakai fai matutakiaga au mo e Atua,” he talahau he tagata taane ke he tau fifine fuata ne aahi atu ki a ia. Pete ia, ne fakaalofa a laua ki a ia mo e toka e tuleke ne fakave ke he Tohi Tapu Ko e Heigoa e Amaamanakiaga ma e tau Fakahelehele Kua Mamate? Ne totou e ia he afiafi ia mo e moua e mafanatia.

Nakai leva e mole, ne liliu mai e tau fifine Kerisiano tokoua. Ne manatu e laua e momoko lahi he tagata taane he aahi mua mai ha laua ti o mai ke fakaati kua fēfē a ia. “Ne ofo au,” he tohi he tagata taane he magaaho fakamui, “ha ko e tau tagata kehe tokoua nei ne leveki mai ki a au ti manamanatu ke he tuaga haaku.” Ne atihake a ia he tau manatu ne tala age e laua mai he Tohi Tapu. Ne pehē e tau fifine to liliu mai a laua. Ne fiafia lahi e tagata taane ti omoomoi ke talahau e manatu i luga he tohi ne fakafano atu ke he Fale he Kautu he Tau Fakamoli a Iehova he matakavi ia.

Ato hiki atu ke he matakavi ne tata lahi ke he taha he tau fanau haana, ne fina atu e tagata taane nei ke he feleveiaaga Kerisiano he Tau Fakamoli a Iehova ti kai auloa foki mo e magafaoa he taha he tau fifine fuata. Ne tohi e ia: “Ko e toka hane fai e au e matakavi nei, ka e ko e tau fuata ia mo e lotu ha mutolu to manatu tumau e au ti pihia foki ke he tau liogi haaku. E, kua liogi tumau foki au mogonei. Ti kua hiki katoatoa au. Ko e tau fuata ia ne fakaohooho lahi ke he moui haaku ke he faahi ia, to fakaaue tukulagi au ki a laua.”