Fakamatala he Makete
HE NOFO he maaga ko Atenai, ne fano e aposetolo ko Paulo he tau aho oti ke he malē ke fakamatala e tala mitaki hagaao ki a Iesu. (Gahua 17:17) Ne fifili e Paulo e malē ha ko e lotouho a ia he moui he tau tagata Atenai.
Teitei 2,000 tau fakamui, ne fakaaoga agaia he tau tagata ha Iehova e malē, po ke makete, ke folafola ai e fekau he Kautu he Atua. Ko e ha? Ha kua tokologa e tagata ka moua i ai. He vahā nei, kua tatai e makete mo e tokaaga he tau fale koloa. He moua e fakaatāaga mai he takitaki po ke pule he fale koloa, ne fakaaoga he falu Fakamoli e laulau po ke fata ke fakatātā e tau tohi faka-Tohi Tapu.
Ma e fakatai, he tokaaga he tau fale koloa i New Jersey, U.S.A., ne ha ha i ai e fakatātāaga fuluola he tau tohi ne tukutuku ke he mataulu “Fakatumau e Tau Puhala Aoga he Magafaoa—Fēfē?” Ko e fua? He taha e aho, ne foaki ai 153 e tohi ke he ono e vagahau.
Taha e fifine ne fina atu ke he fata ne fakatātā e tau tohi mo e fanogonogo fakamakutu ke he fakamaamaaga he taha he Tau Fakamoli. Ne talia he fifine kua aoga ke putoia e Atua ke he tau momoui ha tautolu mo e tau magafaoa ha tautolu. Ne moua e ia e tau tohi nei: Learn From the Great Teacher, The Secret of Family Happiness, mo e Questions Young People Ask—Answers That Work.
Taha e tagata taane he pale laā ia ne fakatemole he mena ne fakatātā e tau tohi mo e amanaki ke hū atu ke he fale koloa he tapa ia. Ne mailoga e ia e tohi Young People Ask. Ne kitia he matakainaga fifine ne tū i ai e mata fiafia he tagata. Ati hūhū a ia ki ai, “Manako ka koe ke he taha tohi?” Ne gakigaki a ia ti tuhi ke he tohi Young People Ask. Ne fakaolo age e ia e tohi, ka kua fitā e tagata he oho ki ai. Ne tala age e ia na tolu e tama haana. He matutaki e tutala ha laua, ne talahau e ia na fa tutala a ia mo lautolu lagataha he faahi tapu. Ko e fanau tokoua fakamua haana ko e tau fuata mui. He kitekite ke he tohi, ne pehē a ia to mukamuka ke fakaaoga ai ke takitaki aki e falu fakatutalaaga fakamagafaoa ha lautolu. Ne fakakite foki he matakainaga ki a ia e tohi The Secret of Family Happiness, mo e fakamafana age to moua e ia mo e hoana haana falu fakatonuaga aoga lahi he taute e tau fifiliaga he magafaoa. Ne loto fakaaue e tagata ke he manatu, ti foaki e mena fakaalofa, mo e talia ke fai tagata ke aahi atu ki a laua.
Fēfē e logonaaga he Tau Fakamoli ke he aho ha lautolu he fakamatala ke he tokaaga he tau fale koloa? “Ne fiafia au ke he puhala fakamatala nei,” he talahau he taha matakainaga fifine. “Ko e mena mitaki lahi a ia ne tupu ki a au!” Ne talahau taha matakainaga fifine: “Pehē a Iehova to fakamatala e tala mitaki ke he tau kalakala oti he lalolagi. He aho nei i Paramus, New Jersey, ne hokotia e tala mitaki nei ke he tau tagata he tau vagahau kehekehe. Ko e homo ha ia ke fai vala he fakaholoaga nei. Ne fiafia a lautolu oti ne fakalataha ki ai. Nakai fai ia mautolu ne loto ke mavehe he aho ia.”
Maeke nakai a koe ke fakalaulahi e tau puhala haau he fakamatala e tala mitaki? Ko e matapatu puhala fakamatala ha tautolu ko e ō he taha fale ke he taha fale. (Gahua 20:20) Ti manamanatu nakai a koe mogoia ke fakamatala he makete po ke tokaaga he tau fale koloa?