Tau Hūhū he Tau Tagata Totou
Magaaho fe ne liti hifo a Satani he lagi?—Fakakite. 12:1-9.
Pete he nakai talahau he tohi a Fakakiteaga he Tohi Tapu e magaaho tonu ne liti hifo a Satani, ka kua talahau e tau mena tutupu ka maeke ke lagomatai a tautolu ke fuafua e magaaho haana ne liti hifo he lagi. Ko e mena fakamua ne tupu ko e fanauaga he Kautu faka-Mesia. Mui mai he mena ia, ‘kua tau ai e lagi,’ ati kaumahala a Satani mo e liti hifo he lagi.
Ne fakamailoga fakamaali he tau Tohiaga Tapu e tau 1914 ko e “tau vaha he tau motu kehe” ne fakaoti ti fakatū e Kautu.a (Luka 21:24) Leva fēfē he mole e tau he lagi, ti liti hifo a Satani?
“Kua tu foki e tarako [Satani] ki mua he fifine ko e fanau ne fai,” he talahau he Fakakiteaga 12:4, “kia kai ai e ia hana tama ka fanau mai.” Ne fakakite he mena nei kua manako a Satani ke he ha puhala ni ke moumou fakaave e Kautu fanau foou ka fanau mai. Pete kua taofi e Iehova a Satani he taute e foliaga kelea haana, ne eketaha mo e fakatumau a Satani he lali ke fakahagahaga kelea e Kautu fakatū foou. Ka kua maeke agaia ia “Mekaeli mo e hana tau agelu” ke gahua fakamafiti ke utakehe “e tarako . . . mo e hana tau agelu” mai he lagi ke nakai fakahagahaga kelea e Kautu. Kua talahau he mena nei ko e kaumahala mo e liti hifo ha Satani ne hoko ai he nakai leva e mole e fanauaga he Kautu he 1914.
Taha mena foki ke manamanatu ki ai ko e liliu tu mai he tau Kerisiano ne fakauku—tuga ne fakakite he fakamooliaga he tau Tohiaga Tapu—kua kamata he nakai leva e mole e fakatū e Kautu.b (Fakakite. 20:6) Ha kua nakai fai he tau matakainaga fakauku he Keriso kua talahau ke fakalataha mo Iesu ke he tauaga mo e tarako mo e haana tau agelu, ko e tauaga he lagi mo e tolo hifo a Satani mo e haana tau temoni ne liga fakakatoatoa he magaaho ne kamata e fakaliliu tu mai he tau matakainaga he Keriso.
Ti nakai fakakite mogoia he Tohi Tapu e magaaho tonu ne vega hifo a Satani mo e haana tau temoni he lagi. Ka kua kitia maali ai, ne tupu e mena nei he nakai leva lahi he fakapatuiki a Iesu Keriso i luga he lagi he 1914.
[Tau Matahui Tala]