Tau Hūhū he Tau Tagata Totou
Ne fitā a Iesu he fakamatala ke he motu katoa. Ti maeke fēfē he aposetolo ko Peteru ke talahau ko e tau tagata Iutaia mo e tau iki ha lautolu kua ‘eke mo e nakai iloa’ he tamate a Iesu?—Gahua 3:17.
He vagahau ke he matakau he tau Iutaia hagaao ke he matagahua ha lautolu he tamate e Mesia, ne pehē e aposetolo ko Peteru: “Kua iloa tuai e au ne eke e mutolu mo e nakai iloa, ti pihia mo e ha mutolu a tau iki.” (Gahua 3:14-17) Liga nakai maama he falu Iutaia a Iesu mo e fakaakoaga haana. Ka ko e falu, ko e tau fatuakiloto he nakai maama fakaagaaga kua putoia e nakai manako ke fakafiafia e Atua, fili tagata, mahekeheke, mo e vihiatia lahi.
Manamanatu ke he lauiaaga he nakai manako ke fakafiafia a Iehova, he mailoga kua tokologa ne iloa e fakaakoaga ha Iesu. Ne fakaaoga tumau e Iesu e tau fakataiaga he fakaako atu, ti fakamaama e ia ke he tau tagata oti ne manako ke iloa atu foki. Ka ko e falu ia lautolu, ne o kehe ai, mo e nakai lali fakalahi ke maama. He taha magaaho, ne ita e falu tutaki he vagahau fakatai ne fakaaoga e Iesu. (Ioane 6:52-66) Kua kaumahala a lautolu ia ke mailoga na kamatamata he tau fakataiaga ha Iesu e mautali ha lautolu ke hiki e tau manamanatuaga mo e tau gahua ha lautolu. (Isaia 6:9, 10; 44:18; Mata. 13:10-15) Ne tiaki foki e lautolu e perofetaaga ke he tau fakataiaga ne fakaaoga he Mesia he fakaakoaga haana.—Sala. 78:2.
Ha ko e fili tagata, ne tiaki he falu e tau fakaakoaga ha Iesu. He fakaako atu a ia he sunako he maaga haana, ko Nasareta, ne “ofomate” e tau tagata. Ka e mamao ligo mai he talia a Iesu ko e Mesia, ne fakatū e lautolu e tau hūhū ke he tupumaiaga haana: “Moua mai fe he tagata nai e tau mena ia? . . . Ka e nakai kia ko e tagata tafale hanai, ko e tama a Maria, ko e matakainaga foki ha Iakopo, mo Iose, mo Iuta, mo Simona? Ti nakai kia ha hinai ia tautolu hana lafu mahakitaga?” (Mare. 6:1-3) Ke he tau tagata Nasareta, kua nakai aoga e tau fakaakoaga ha Iesu ha kua tokolalo e tupumaiaga haana.
Ka e kua e tau takitaki lotu? Laulahi ia lautolu ne fakateaga ke fanogonogo ki a Iesu ha ko e tau kakano taha ia. (Ioane 7:47-52) Ne tiaki foki e lautolu e tau fakaakoaga ha Iesu he mahekeheke a lautolu ha kua fanogonogo e tau tagata ki a ia. (Mare. 15:10) Ti tokologa foki e tau tagata talahaua ne nakai fiafia he hataki e ia a lautolu ha ko e fakatupua mo e fakavai ha lautolu. (Mata. 23:13-36) Ne fakafili mooli e Iesu e nakai fia iloa pauaki ha lautolu he pehē: “Oi fakaalofa kia mutolu e tau ako fakatufono! ha kua uta e mutolu e kei he maama; nakai huhu atu ai [ke he Kautu] a mutolu, kua hataki foki e mutolu a lautolu ha ne huhu atu.”—Luka 11:37-52.
Ke he tolu mo e hafa e tau, ne fakamatala e Iesu e tala mitaki ke he motu. Ne fakamahani foki e ia e falu ke taute e gahua ia. (Luka 9:1, 2; 10:1, 16, 17) Ne lauia mitaki lahi a Iesu mo e tau tutaki haana ati gugū ai e tau Farasaio: “Kitiala, kua mumui atu kia ia e lalolagi.” (Ioane 12:19) Ti nakai ko e ai iloa katoatoa he laulahi he tau Iutaia. Ka ko e fakatumau pauaki ha lautolu ke “nakai iloa” a Iesu ko e Mesia. Na maeke ia lautolu ke fakahokulo e iloilo mo e fakaalofa ha lautolu ke he Mesia, ka e nakai taute e lautolu. Ne kau hahai e falu ke he mate ha Iesu. Ati tomatoma he aposetolo ko Peteru e tokologa ia lautolu: “Kia tokihala a a mutolu, mo e mafokifoki a mutolu, kia holoholo kehe ai ha mutolu a tau hala, kia hoko mai ai foki e tau tau ke okioki ai mai mua [a Iehova]; kia fakafano mai ai foki e [I]a a ia ne fakamatala mai fakamua kia mutolu, ko Iesu Keriso haia.” (Gahua 3:19, 20) Kua mailoga mitaki ne tokologa lahi e tau Iutaia ne kamata ke fanogonogo, putoia e “tokologa he tau ekepoa.” Ne nakai liu a lautolu eke po ke, taute mo e nakai iloa. Ka kua fakatokihala a lautolu ti moua e taliaaga ha Iehova.—Gahua 2:41; 4:4; 5:14; 6:7.