“Totokoaga ne Lata ke Fakalilifu”

KO E pule kelea he tagata fakatonutonu Sihamani ko Adolf Hitler, ne moua e ia hogofulu e afe he tau tohi. He 1945, he nonofo ai e tau tagata Rusia he matakavi ne agaagai i Berlin, laulahi he tau tohi nei ne uta ki Moscow mo e toka i ai. Ko e tagata tohia fakamauaga tuai ko Henrik Eberle ne kumikumi ke he afe he tau tohi ia he tanakiaga tuai i Moscow ke maeke ke fakaako ko hai ne tohi ki a Hitler ti ko e ha. Ne lomi fakailoa e Eberle e tau fakahikuaga haana he tohi ne mataulu Briefe an Hitler (Tau Tohi ki a Hitler).

“Ko e tau faiaoga mo e tau fanau aoga, tau fifine pope mo e tau patele, tau tagata nakai fai gahua mo e tau tagata pisinisi iloilo, tau takitaki kau mo e tau kautau—ne tohi oti a lautolu ki a Hitler,” he ui he Dr. Eberle. “Falu ne fakalilifu ki a ia ko e Mesia liu fanau; falu ne kitia a ia ko e matapatu he mahani kelea lahi.” Moua nakai e Hitler e totokoaga mai he tau tagata lotu hagaao ke he tau favaleaga ne taute he National Socialists, po ke Nasi? Ha ha i ai falu ka e gahoa mo e lavea e tau tohi ia.

Ka ko e tau tanakiaga tuai i Moscow, ne moua e Eberle e fakamauaga ne toka ai e loga he tau tohi ne fakafano he Tau Fakamoli a Iehova ki a Hitler mai he tau faahi kehekehe ha Sihamani, he totoko ke he tau aga he tau Nasi. Ti ko e Tau Fakamoli mai he kavi ke he 50 e motu ne fakafano ki a Hitler kavi ke he 20,000 he tau tohi mo e tau ualesi ke totoko e ekefakakelea he Tau Fakamoli a Iehova. Totou afe e Tau Fakamoli ne tapaki, mo e totou teau ne tamate po ke mamate ha ko e ekefakakelea he tau Nasi. Ko Dr. Eberle ne fakahiku aki: “He onoonoaga ke he tau miliona tagata ne pakia noa he pule Nasi, liga tote e numera nā [he tau tagata Fakamoli ne pakia noa]. Ka kua fakamooli e gahua he mahani he matakau mo e nakai fakahui e totokoaga ne lata ke fakalilifu.”