TAU HŪHŪ HE TAU TAGATA TOTOU
Kua kakano kia e onoonoaga ha Tavita ia Salamo 37:25 mo e talahauaga ha Iesu ia Mataio 6:33 to nakai fakaatā e Iehova e Kerisiano ke temotemoai e tau mena kai?
Ne tohi e Tavita kua “nakai kitia e [ia] ha tagata tututonu kua tiaki, po ke hana fanau kua ole mena kai.” Fakavē e talahauaga haana ke he mena ne tupu ni ki a ia. Iloa mitaki e ia e levekiaga fakatumau he Atua. (Sala. 37:25) Ka e nakai kakano e tau kupu ha Tavita to nakai fai tagata tapuaki ka matematekelea po ke to matematekelea he temotemoai e tau mena ne moua.
Ha ha i ai e tau magaaho ne mailoga e Tavita e tau tutūaga uka lahi. Taha magaaho pihia ne hola a ia mai ia Saulo. Ne temotemoai e tau mena kai ha Tavita, ti ole a ia ke moua e areto ma haana fakalataha mo lautolu ne ha ha mo ia. (1 Samu. 21:1-6) Ko e magaaho ia, kua “ole mena kai” a Tavita. He tuaga uka ia, ne iloa e ia kua nakai tiaki e Iehova a ia. Ti nakai fai mena kua totou e tautolu na kaiole a Tavita ke moua e mena kai kua lata ke moui.
Ia Mataio 6:33, moua e tautolu e fakamalolōaga ha Iesu to fakapuke he Atua e tau manako he tau fekafekau fakamooli ne tuku fakamua he moui e tau mena he Kautu. “Ka kia kumikumi fakamua a mutolu ke he kautu he Atua mo e hana tututonu,” he talahau e Iesu, “ati lafi atu ai e tau mena oti ia [putoia e tau mena kai, tau mena inu, mo e tau mena tui] kia mutolu.” Ka e fakakite foki e Iesu, ha ko e favaleaga to liga lauia foki e “tau matakainaga” haana he hoge. (Mata. 25:35, 37, 40) Tupu e mena ia ke he aposetolo ko Paulo. Falu magaaho ne logona e ia e fia kai mo e fia inu.—2 Kori. 11:27.
Kua talahau e Iehova ki a tautolu to favale ki a tautolu ke he tau puhala kehekehe. Liga fakaatā e ia a tautolu ke lauia he nofogati he lagomatai a tautolu ke tali atu ke he tau hokotaki ne fakahoko he Tiapolo. (Iopu 2:3-5) Ma e fakatai, falu he tau matakainaga Kerisiano ha tautolu, tuga a lautolu ne tuku ke he tau kemuaga pagotā Nasi ne lauia ke he hagahaga kelea lahi ha ko e favaleaga. Ko e fakanofogati e Tau Fakamoli he temotemoai e tau mena kai ko e taha puhala kelea muitui ne fakaaoga he lali ke moumou e mahani hakohako ha lautolu. Ko e Tau Fakamoli mahani hakohako ne fakatumau ke omaoma ki a Iehova; ti nakai tiaki e ia a lautolu. Ne fakaatā e ia a lautolu ke lauia he kamatamata nei, tuga ni he fakaatā e ia e tau Kerisiano oti ke fehagai mo e tau kamatamata kehekehe. Ka e, nakai fakauaua kua lalago e Iehova a lautolu oti kua matematekelea ha ko e higoa haana. (1 Kori. 10:13) Tokaloto e tautolu e tau kupu ia Filipi 1:29: “Ko e mena kua foaki mai kia mutolu, ha ko Keriso, nakai ko e tua kia ia hokoia, ka kia mamahi foki a mutolu ha ko ia.”
Mavehe e Iehova to fakalataha a ia mo e tau fekafekau haana. Ma e fakatai, ia Isaia 54:17, ne pehē: “Ko e tau kanavaakau oti kua taute ke tau kia koe, nakai monuina ia.” Ko e tau maveheaga nei mo e falu maveheaga pihia foki kua fakamooli e puipuiaga he tau tagata oti he Atua. Ka e, liga to lauia e Kerisiano ke he tau kamatamata ke teitei hoko ke he mate.