ILOA NAKAI E KOE?
Tuga ne fakaaoga he Tohi Tapu, ko e heigoa e kakano he kupu “eunuka”?
Ko e fakatino Asuria he eunuka
Falu magaaho, kua hagaao e kupu ke he tagata taane ne hehele kehe ai haana fūuho. He tau vahā Tohi Tapu, falu tagata taane ne hehele kehe e fūuho he fakahala, tapaki po ke fakatupa a ia. Ko e tau tagata taane ne falanaki ki ai ne hehele kehe e fūuho kua leveki e tau fale nonofo mo e koukou he tau hoana fakahoa he patuiki. Ma e fakatai, ko e tau eunuka ko Hege mo Sasesaka ne leoleo e tau hoana mo e tau hoana fakahoa he Patuiki ko Ahasueru ha Peresia, ne manatu ai ko Xerxes I.—Eseta 2:3, 14.
Pete ia, i loto he Tohi Tapu ne nakai hehele kehe e fūuho he tau eunuka oti. Falu tagata pulotu ne pehē ko e kupu ia ne fakaaoga foki ke hagaao ki a lautolu ne kotofa pauaki ke gahua ki mua he patuiki. Liga ko e puhala anei ne hagaao ai ki a Epetameleka, ko e kapitiga ha Ieremia, mo e tagata Aitiope ne fakamatala e evagelia ko Filipo ki ai. Ko Epetameleka ko e fekafekau lilifu lahi, ha kua atāina a ia ke fano ke he Patuiki ko Setekaia. (Ieremia 38:7, 8) Pihia foki e tagata Aitiope ne leveki e tau koloa he patuiki “ne fina atu a ia ki Ierusalema ke liogi ai.”—Gahua 8:27.
Vevehe he ha he tau leveki mamoe e tau mamoe mai he tau koti he tau vahā Tohi Tapu?
Ka fakamaama e fakafiliaga he vahā anoiha, ne pehē a Iesu: “Ka hau e Tama he tagata mo e hana lilifu . . . ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti.” (Mataio 25:31, 32) Ko e ha kua vevehe he tau leveki mamoe e tau manu nei?
Fa mahani, ne nonofo auloa e tau mamoe mo e tau koti ke kai he fonua he aho. He pō ne fakapotopoto ai ke he tau pa ke puipui mai he tau manu vale, tau tagata kaihā, mo e makalili. (Kenese 30:32, 33; 31:38-40) Ko e tau manu ia ne tuku ke he tau pa kehekehe ke puipui e tau mamoe totonu, mua atu e tau mamoe fifine mo e tau punua mamoe, neke fakapakia ai he tau koti vale. Ko e leveki mamoe ne vevehe foki e tau mamoe mai he tau koti ka “fanafanau, moua mai e puke huhu, mo e hifi e tau manu,” ne talahau he tohi All Things in the Bible. Ko e fakataiaga ha Iesu ne liga moua mai he tau gahuaaga mo e tau iloaaga ne mahani ki ai e tau tagata fanogonogo he tuaga leveki manu tuga i Isaraela i tuai.