TAU VALA TALA I MUA
Ko Hai e Tau Fakamoli a Iehova?
“Kua leva lahi e iloa e au a Mike. Ko ia ko e taha he Tau Fakamoli a Iehova. Ka e nakai maama ia au e lotu haana. Ko hai a Iehova? Ko e ha e Tau Fakamoli ne nakai fakamanatu e tau aho okioki? Kua lafi kia a Mike mo e taha vahega fakalotu?”—Becky, California, U.S.A.
“Magaaho ne kamata e tau tagata he tuuta kaina haaku ke fakaako e Tohi Tapu mo e Tau Fakamoli a Iehova, ne manamanatu au: ‘Ko e heigoa e kakano he matahigoa ia, Tau Fakamoli a Iehova? Kehe ha ia he higoa ke fakahigoa aki e lotu!’”—Zenon, Ontario, Kanatā.
“Manatu au mo e hoana haaku na ahiahi mai e Tau Fakamoli a Iehova ke fakafuafua kelea a maua ha kua nakai ō tapu. Ti manatu a maua ka nakai maeke e tau lotu lalahi ke tali e tau hūhū ha maua, to nakai fakaai foki e vahega lotu ne kehe ni tuga he Tau Fakamoli a Iehova ke fai tali.”—Kent, Washington, U.S.A.
“Ai iloa mooli e au ko hai a lautolu mo e ko e heigoa e tau taofiaga ha lautolu.”—Cecilie, Esbjerg, Denmark.
Liga kitia e koe a lautolu ne fakamatala mai he taha gutuhala ke he taha gutuhala po ke he toloaga tagata, tufa he tau tohi ne fakavē ke he Tohi Tapu, mo e foaki e tau fakaako Tohi Tapu nakai fai totogi. Liga moua e koe e mekasini nei mai he taha ia lautolu. Ka e manamanatu agaia a koe ko hai mooli e Tau Fakamoli a Iehova. Liga tatai e tau manatu haau mo e taha manatu ne fatiaki i luga.
Ka fai manatu mo e hūhū pihia a koe, to fano a koe ki fe ke moua e tau tali? Maeke fēfē ia koe ke iloa e tau taofiaga mooli he Tau Fakamoli a Iehova, moua fēfē e lautolu e tupe ma e gahua fakamatala mo e tau fale tapuakiaga ha lautolu, ti ko e ha ne ahiahi atu a lautolu ke he kaina haau mo e feleveia atu ki a koe he tau toloaga tagata?
“Loga e tau mena haaku ne totou hagaao ke he Tau Fakamoli a Iehova he Initanete,” he talahau e Cecilie, ne totoku i luga. “Logona e au falu tala tū fakaholo, ti loga lahi e tau tala ekefakakelea ne fanogonogo au ki ai. Ko e fua, ne onoono fakakelea au ke he Tau Fakamoli a Iehova.” Fai magaaho he mole, ne tutala fakahako a ia mo e Tau Fakamoli a Iehova ti iloa e tau tali mauokafua ke he tau hūhū haana.
Manako nakai a koe ke moua e tau tali mooli ke he tau hūhū haau hagaao ke he Tau Fakamoli a Iehova? Fakamafana e mautolu a koe ke fina atu ki a lautolu ne iloa mooli ai—ko e Tau Fakamoli a Iehova, ko lautolu ne lolomi e mekasini nei. (Tau Fakatai 14:15) Amanaki a mautolu to lagomatai he tau vala tala ka mumui mai a koe ke kitia ko hai a mautolu mo e ko e heigoa e tau taofiaga, ti iloa foki e gahua ha mautolu ne taute.