Ko Hai e Atua?

Tokologa e tagata ne talahau kua talitonu a lautolu ke he Atua. Ka hūhū ki ai ko hai e Atua, kua kehekehe e tau tali. Ke he falu, ko e fakafili peehi malolō e Atua ne lali fakalahi ke fakahala e tau tagata ka hepehepe. Ke he falu, kua fakaalofa mo e fakamagalo tumau e Atua ti atāina e tau gahua oti ha lautolu. Talitonu falu na mamao ligo e Atua ti nakai manamanatu ki a tautolu. Kua kehekehe pihia e tau onoonoaga ti tokologa ne logona hifo kua nakai fakaai ke iloa ko hai e Atua.

Aoga nakai e mena ia? Ē, aoga. Maeke he iloa mitaki e Atua ke aoga mo e fai kakano e moui haau. (Gahua 17:26-28) Ka fakatata lahi a koe ke he Atua, to fakaalofa mo e lagomatai foki e ia a koe. (Iakopo 4:8) Ka e mua atu ai, ko e iloilo tonu he Atua ka takitaki ke he moui tukulagi.—Ioane 17:3.

Maeke fēfē a koe ke iloa e Atua? Manamanatu ke he tagata kua iloa mitaki e koe, tuga e kapitiga tata. Feaki fēfē e kapitiga ha mua? Liga iloa e koe haana higoa, mahani, tau mena ne fiafia ki ai mo e nakai fiafia ki ai, pihia foki mo e tau gahua kua mole mo e tau mena kua fakatoka ke taute, mo e loga atu foki. Ko e tau mena nei ati tata a koe ke he tagata ia—tau mena haau ne iloa hagaao ki a ia.

Maeke foki a tautolu ke iloa e Atua he manamanatu ke he tau mena nei:

KO HAI E HIGOA HE ATUA?
KO E HEIGOA E TAU AGA HAANA?
KO E HEIGOA KUA TAUTE HE ATUA?
KO E HEIGOA HAANA KA TAUTE?
KO E HEIGOA E KAKANO MA HAAU KE ILOA E ATUA?

Kua tauteute e mekasini nei ke moua e tau tali mai he Tohi Tapu ke he tau hūhū ia. To lagomatai he tau vala tala a koe ke iloa a ia ko e Atua mo e tau fua mitaki he moua e koe e fakafetuiaga tata mo ia.