Puha Huhu

◼ Ko e heigoa ke taute ka ai hoko mai a ia ne lata ke lauga he magaaho ne poaki he feleveiaaga?

He falu magaaho, ha ko e tau tuaga nakai mitaki kua nakai hoko mai e matakainaga tane ke taute e lauga hana he magaaho ne setulu ai. Kaeke iloa kua pugapuga mai a ia, liga lata he tau motua ke fifili ke kamata mo e Fakaakoaga Kolo Toko; ati matutaki fakahiku ke he Feleveiaaga ma e Tau Tagata. Ka e kua ka kitia, nakai tai hoko mai a ia ke lauga? Liga lata taha tagata lauga he fakapotopotoaga ke taute e lauga ne fita he tauteute e ia.

Ka fakatoka tuai fakaeneene to nakai tupu e lekua nei. Ko e tagata fakatokatoka lauga ka lata ke fakailoa fakamua ke taha e tapu ke he tau gutuvagahau takitokotaha ke fakamanatu a ia ke he kotofaaga hana. Putoia ke he fakamanatuaga ia e tula he feleveiaaga, e kaina he Fale he Kautu mo e numera he foni, ti fakamaama tonu e hala ke finatu ke he fale. Ati lata e gutuvagahau ke mailoga fakaeneene e tau fakamatafeiga nei. Lata ia ia ke leveki fakamitaki e kotofaaga nei, ke fakahaohao fakamitaki hana tau gahua fakatagata ti maeke ia ia ke fakamoli e matagahua nei. Kaeke tupu e lekua ti taofi a ia he taute ai, lata ia ia ke mafiti ke fakailoa e tagata ne fakatokatoka lauga ke moua foki e tagata ke hukui. Kia lali fakalahi ke aua tiaki noa e lauga. Kaeke pugapuga mai e gutuvagahau ti gahoa e tau minuti to hau, lata ia ia ke vilo atu ke he Fale he Kautu ti maeke he tau matakainaga ke iloa e puhala he fakaholoaga.

He loto fakaaue ma e tau kotofaaga lauga ki mua he tau tagata, ti fakatokatoka fakamitaki tuai mo e tau fakamanatuaga, mo e leveki fakaeneene kua maeke moli e fakapotopotoaga ke moua e aoga mai he tau lauga ki mua he tau tagata he tau fahitapu oti.