Ko e Fakamoli Mau Nakai a Koe?
1 To tali nakai a koe e ke he huhu nei? Pete ni kua nakai maeke oti e tau fekafekau tukulele a Iehova ke fakamau ke he fekafekauaga mau, nakai kia kua mitaki ia tautolu oti ke amanaki ke manamanatu hifo ki a tautolu ni ko e hana a Tau Fakamoli mau? Kua lata moli ni a tautolu ke pihia.
2 Nakai maeke e taha ke eke ko e Kerisiano fakaku. Ne pehe a Iesu he hana a Matua: “Ko e mena eke mau e au e tau mena kua mitaki kia ia.” (Ioane 8:29) Ko Paulo, ne tatai e manamanatu, ne fakamafana mai a tautolu “kia eke e mutolu e tau mena oti kana ke fakaheke ai ke he Atua.” (1 Kori. 10:31) Ko e mena ia, kua lata ki a tautolu oti ke manamanatu hifo a tautolu ni ko e Tau Fakamoli mau a Iehova. Ko e tau manamanatuaga ha tautolu ke he puhala nei to fakaohooho a tautolu ke ekegahua mitaki ke he tau mena oti ne tutuli a tautolu ki ai.
3 Manamanatu ke he Fakamoliaga: Ko e tauteute, vagahau, mo e mahani ha tautolu ka maeke ke fakakite atu ke he falu tagata kua moli ko e Tau Fakamoli a Iehova a tautolu. Kua kikili lahi kia tautolu e manako ke gali e tauteute, ke vagahau fakamitaki, mo e ke mahani mitaki tumau he gahuahua ai a tautolu ke he fonua po ke o ai ke he tau feleveiaaga faka-Kerisiano. Pete ni, he o a tautolu ke he tau aoga, gahuaaga, po ke fakalataha he ha fakafiafiaaga, kua lata e tau mena oti ne taute e tautolu ke fakakite kua momoui a tautolu ke he tau fakatufono tututonu a Iehova.
4 Ne pehe a Iesu: “Nakai maeke ke galo e māga kua fakatu i luga he mouga. . . . Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.” (Mata. 5:14-16) Hanei kua lata ke fakamoli a tautolu ke he tau mena oti ne taute mo e ke he tau magaaho oti. Kaeke kua fakauaua a tautolu he falu magaaho ke foaki e fakamatalaaga ha ko e mena ne ha ha ai a tautolu po ke ha ko e mena ha tautolu ne taute, kua lata ke huhu hifo a tautolu ki a tautolu ni, ‘Kua fekafekau fakaku po ke fakatumau a au kia Iehova?’ Aua neke kalo kehe mai a tautolu he magaaho ke fakamatala atu ke he falu hagaao ke he tala mitaki he Kautu he Atua.
5 Aua nimo, kua fakalilifu mo e fakafiafia e tautolu a Iehova ka tali e tautolu e huhu “Ko e Fakamoli mau nakai a koe?” mo e kupu fakataogo “E!”