Kauauloa a Tautolu Oti Kana ke Fakakatoatoa e Gahua

¹ Kua lata e tau tutaki oti kana ha Iesu Keriso ke mahino ko e mena aoga lahi e ulufakina hana ke lagomatai mo e fakalataha atu ke he gahua fakamatala he Kautu. Na mailoga e Iesu to fakatupu he tau tutaki hana e tau numera kehekehe he tau fua he Kautu. (Mata. 13:23) Pete kua lahi e vala he gahua fakamatala ne taute he tau paionia gahua fakamakutu, ko lautolu oti ne fakamoli mau ke fakaheke ke he Atua he fakatupu e tau fua ke he mena kua fahia, kua lata ke nava ki ai.​—Ioane 15:8.

² Lahi e Katoatoaaga ha ko e Tau Laliaga Auloa: Ne talahau tuai e Iesu to fakatupu he tau laliaga kehekehe he hana tau tutaki e tau gahua kua mua atu mai he hana. (Ioane 14:12) Po kua fakakaupa ni ha tautolu a tau tutuaga takitokotaha ke he mena ke fahia a tautolu ke taute po ke fakaata a tautolu ke fakafita ke he fakamatalaaga he Kautu, kua lata ia tautolu oti ke fakakatoatoa e gahua. Kua tuga ni he tohi e Paulo: “[Ko e] tino katoa kua fakamau, mo e tutaki fakalataha, kua tupu ai e tino ha ko e lagomatai mai he tau fatia takitaha, ke lata mo e gahua he fafatiaga he tau fahi tino takitaha, kia ati hake ai he tino.”​—Efeso 4:16.

³ Liga logona hifo he falu kua nakai lahi e tau laliaga ha lautolu. Ka e, ki a Iehova kua mua e aoga he fekafekau mo e loto katoa ha tautolu. Ko e tau mena oti ne taute e tautolu ma hana kua uho mo e mailoga mitaki.​—Fakatatai Luka 21:1-4.

⁴ Kia Tumau ke Lagomatai e Gahua: Toka ia tautolu oti e kotofaaga ke lagomatai fakatino ke he gahua he lalolagi katoa. Kua lata e falu ke laveaki foki ke he gahua tino he lagomatai e gahua he Kautu. Kua lata ke igatia ke lali ke tali he tau feleveiaaga mo e fakalataha ke he Aoga Fekafekau Fakateokarasi. He fakaaoga e tau magaaho ke fakamafana e falu, kua uho e lagomatai ha tautolu ke he tuaga fakaagaga he fakapotopotoaga, ati fakatolomaki he mena nei e lotomatala ke fakakatoatoa e gahua ne kotofa ki ai.

⁵ E, lata ke kauauloa a tautolu oti kana ke fakakatoatoa e gahua. Nakai kia manatu taha kua tiaki a ia. Ko e ha tautolu a tau laliaga lafilafi, lahi mo e tote, he fekafekau ki a Iehova kua fakatu kehe mai a tautolu ko e tau tagata tapuaki moli he Atua. (Mala. 3:18) Kua maeke ia tautolu ke fakaigatia ke fai vala aoga he fakaheke ki a Iehova mo e he lagomatai e falu ke iloa mo e fekafekau ki a ia.