Puha Huhu

◼ Ko e heigoa e puipuiaga he tau mamatua kua lata ke fakaaoga ka gahua auloa mo e fanau ikiiki ha lautolu he fonua?

Kua uta fakalataha fakamitaki he tau mamatua Kerisiano ha lautolu a tau fanau ke he fekafekauaga he fonua, fakaako ai kia lautolu ke foaki e tala mitaki he Kautu ke he falu. Ha ko e mena ia, kua lata lahi ke tokamata e tau fanau ikiiki ha lautolu ha ko e tau hagahagakelea ne fa mafuta mai he fonua, pete ni e tau kalakala kaina “kua haohao mitaki.” He tolomaki fakahaga atu, ko e tau fanau e tau fakahikuaga he favaleaga mo e ekefakakelea he hahana e tau mahani lotokai mo e mahani fakasotoma he “tau aho uka” ne nonofo ai a tautolu. (2 Timo. 3:1-5) Kua lata lahi e tau mamatua ke fakatoka e tau puipuiaga ne lata ke leveki aki e fanau ikiiki ha lautolu mai ia lautolu ne fa takahao a lautolu. Ko e heigoa kua lata ke taute?

Kua tomatoma fakailoilo mai he Tohi Tapu a tautolu ke lotomatala mo e ono ki mua ke kitia tuai e hagahagakelea. (Fakatai 22:3; Mata. 10:16) Ai ko e kakano a e ke fakatu e tau fakatufono, ka e kua mitaki ma e matua po ke taha tagata lahi ke feoaki mo e tama he fekafekauaga he fonua. Kaeke gahua tokoua e fanau fakailoa ne lotomatala, kua mitaki he taha matua po ke taha tagata lahi foki ke tokamata tumau. Ka e moli, he tupu hake e tama mo e kitia e lotomatala, maeke he tau mamatua ke fifili kua lata nakai ia ia ke fakatote e kitekiteaga fakamatua.​—Kikite foki e Puha Huhu he Our Kingdom Ministry ia Oketopa 1992.

Kua mitaki lahi foki ke tokaloto tumau e puipuiaga kaeke ke o fenoga he motoka mo e ka o fano. Ke taute fakamitaki e tau puipuiaga to taofi aki ha totamaki mo e tau kavega mamahi he matematekelea, tau totogi fakaekekafo, mo e ka tupu e tau kavega matafakatufono ne hoko fakahaga mai he lalolagi hopo fono ne agaagai mo tautolu.

Lata ha ia he fanau ikiiki ke ‘fakaheke ke he higoa a Iehova.’ (Salamo 148:12, 13) Ko e tau kupu fakaalofa ha lautolu mo e tau mahani mitaki ha ha ai he fekafekauaga he fonua kua nava mai he falu ti fakalilifu ai ki a Iehova. Tau mamatua na e, he tau mena oti, lagomatai e tau fanau ha mutolu ke fakalataha tumau ke fakamatala e tala mitaki he mataala foki a mutolu ke puipui a lautolu mai he ha hagahaga kelea ne ha ha i ai!