Ko e Kotofaaga Nukua Fakaata ki a Lautolu kua Ikiiki

¹ Tokologa mogonei kua mamatua ne liu manatu fiafia e kotofaaga ne olioli e lautolu ko e tau fanau tutupu hake he kupu moli​—ko e gahua he Aho Mekasini. Ne fakatu e gahua ia he tau fakapotopotoaga oti he 1949. He taha aho he fahitapu, kua lata ke hagaaki e tau tagata oti ke tufatufa he The Watchtower mo e Awake! ke he tau puhala tu, he taha fale ke he taha fale, taha fale koloa ke he taha fale koloa, mo e falu puhala foki. Kua hagaaki fakamakai pauaki e tau tagata fakailoa ikiiki ke taute e gahua nei ha kua foaki ai ki a lautolu e magaaho ke fai vala he gahua taha tuga e tau tagata lalahi he fakapotopotoaga. Pihia nakai a koe he magaaho ne tote a koe?

² Fakagahua Foki Hau a Fanau: Ko e tau fanau ikiiki lalahi ne nakai la mautali ke taute e fakatutalaaga faka-Tohi Tapu he gutuhala kua maeke agaia ke foaki e tau mekasini. Kua lata he ako ni e fakafeleveiaaga mukamuka ke he tau kupu gahoa. Ko e talahauaga ku, liga ke he fakatino he kili, nukua lata. Tokologa e tau tagata he kaina ne talia fiafia e tau senolo mai he ha tautolu a tau fanau ikiiki, fa nava ai ke he loto moli mo e mahani mitaki he tau fuata nei. Fakalataha mo e lagomatai tote, ko e gahua nei e taha mena kua maeke moli he tau fanau ke taute, he foaki e lagomataiaga aoga he folafola e fekau he Kautu. Moli, he tutupu hake e tau fanau, to manako e tau mamatua ha lautolu ke lagomatai a lautolu ke fakatumau e holo ki mua he tau puhala fakamatala ha lautolu.

³ Ne kamata fakamatala a Manuel he taha gutuhala ke he taha gutuhala he tolu e tau he moui hana. Ne fakaako he tau mamatua hana a ia ke ako manatu e fakatataaga ku. Kua fakamatala fakamakutu a ia he tapa ha laua, ti loga e tau mekasini, tau porosua, mo e tau tuleke ne foaki. Ti fakamatala nakai mau tauteute foki a ia. He taha magaaho ne uta he tau mamatua hana a ia ke he paaka ke fefeua, ne fakailoilo a ia he foaki falu tuleke ke he falu tagata i ai. Pete ni e tote lahi a ia, ko e fakamakai ha Manuel ma e fekafekauaga ko e punaaga he fakamaloloaga moli ke he tau mamatua hana mo e ke he fakapotopotoaga katoa.​—Fakatai 22:6.

⁴ Kua taute ai e tau Aho Faiumu oti mo “Aho Mekasini” he 2000 Calendar of Jehovah’s Witnesses. Tau mamatua, kua fakamalolo e mautolu a mutolu ke fakafou e fiafia he gahua nei, he lagomatai e fanau ha mutolu ke fai vala tumau ka maeke ke he kotofaaga he gahua nei.