Kumi e Fiafia he Fekafekauaga Tapu Hau
1 Ne liliu atu a lautolu “mo e fiafia.” Kua talahau mai he Tohi Tapu e logonaaga he tau tutaki toko 70 he liliu atu a lautolu ki a Iesu, he oti e gahua fakamatala lahi. Ne logona e lautolu e fiafia mai he loto ha kua taute e finagalo he Atua. (Luka 10:17) Ko e heigoa ke lagomatai aki a koe ke moua e fiafia pihia he taute e fekafekauaga tapu?
2 Ko e Aga Loto Malolo: Ha ha ia koe e kotofaaga ne foaki he Atua ke fakamahani e tau tagata mo e finagalo homo ue atu a Iehova. He fakamatalaaga hau, kua maeke ia koe ke fakagofua e tau tagata mai he tau mahani fakalialia he lalolagi nai mo e tau toua lapatoa he tau lotu pikopiko. Maeke ia koe ke foaki atu ke he tau tagata e amaamanakiaga he moui he lalolagi ne toka kehe e tau taufetoko ne agaagai ia tautolu he vaha nai. Manamanatu la ke he fiafia ha Iehova ha kua to mo e monuina e koe e tau tega he kupu moli ke he loto mitaki. Kia loto malolo ke liogi ma e agaga he Atua ke moua ia koe e fua he fiafia he tutuli e fekafekauaga mo e loto katoa.
3 Fakaakoaga ke Fakagahuahua: Ko e tau fakaakoaga ne taute e Iesu mo e tau tutaki toko 70 kua fakatatai ke he Feleveiaaga Fekafekau he vaha nai. Ne fakatoka e ia e fakaakoaga ke maeke ia lautolu ke kautu mitaki e fekafekauaga ha lautolu. (Luka 10:1-16) He vaha nai, ne fakaako he Feleveiaaga Fekafekau a koe he tau puhala ke finatu ke he tau tagata, ke kamata e tau tutalaaga, ti kamata mo e taute e tau fakaakoaga Tohi Tapu he kaina. He fakagahuahua e koe ki a koe ni mo e holo ki mua e makaka hau he fakamatala, to kitia e koe ko e tau logonaaga ne fakatupetupe po ke ne fakalavelave aki a koe to fakatote hifo ti hukui aki e loto malolo mo e fiafia.
4 Ono Tonu ki Anoiha: Ne moua e Iesu e fiafia he hana a fekafekauaga tapu pete ni e tau matematekelea ne fakauka e ia. Ko e ha? Ha kua fakamau tonu ni hana mata ke he tau fakamonuinaaga mo e tau kotofaaga kua toka ki mua hana. (Hepe. 12:2) Maeke foki ia koe ke taute pihia he taofi mau e manatu mo e loto tonu hau ke he higoa a Iehova mo e tau fakamonuinaaga ka moua he lalolagi fou he Atua. Ko e mena hanai ka lafi ai e fiafia mo e kakano ke he fekafekauaga hau.
5 Ke taute e fekafekauaga tapu ki a Iehova ko e kotofaaga ne homo ue atu ki a koe ke taute he vaha nai. Koenaia, kia talahau ai a koe: “Haku atua na e, kua fiafia au ke eke hāu a finagalo.”—Sala. 40:8.