Fakaaue Nakai a Koe ke he Fakauka a Iehova?
1 Kaeke ke nakai fakauka a Iehova he tau tau ne mole ke 10, 20, mo e tuma, ke fakalaulahi e gahua fakamatala, na to moua nakai e koe e kupu moli? Kua fakaaue ha ia ha tautolu kua fakata e ia e tokologa he tau tagata ke “hohoko oti kana ke he tokihala.” Ka e, “to hau tuga ne kaiha” e aho lahi he fakafiliaga a Iehova. (2 Pete. 3:9, 10) Koenaia, ne nakai lata e fakauka he Atua ke manamanatu hepehehe kua fakamule mai e fakahikuaga he fakatokaaga nai.—Hapa. 2:3.
2 Kia Fakaalofa ke he tau Tagata: Ko e fakauka a Iehova ne hokulo atu ke he ha tautolu a maamaaga. Ti aua neke galo ia tautolu e kakano hana. (Iona 4:1-4, 11) Kitia e Iehova e tuaga matematekelea he tau tagata ti kua fakaalofa hofihofi ai ki a lautolu. Tatai pihia e logonaaga a Iesu. Ha kua fakaalofa hofihofi ma e moto tagata ne fakamatala a ia ki ai, ne manako lahi a ia ke fakalahi e gahua evagelia ke maeke e tokologa ke moua e ataaga he moui tukulagi.—Mata. 9:35-38.
3 He tau magaaho ka tupu e tau mena fakalutukia mo e tau matematekelea, nakai kia hohofi atu e tau loto ha tautolu ke he tau tagata ne nakai iloa e kupu moli? Kua tuga ai e “tau mamoe nakai fai leveki” e tau tagata he vaha nai he lali a lautolu ke fakafehagai mo e mataala ke he tau matematekelea he lalolagi. (Mareko 6:34) He fakamatala fakamakutu ai e tala mitaki, ne fakamafana e tautolu a lautolu kua loto mitaki mo e fakakite e fakaaue ha tautolu ma e fakauka a Iehova.—Gahua 13:48.
4 Ko e Gahua Fakatepetepe ha Tautolu: Ne papatiso he tau kua mole ke 323,439, mo e molea ke 14,000,000 ne feoaki ke he Fakamanatuaga. Na tokologa ha ia ne toe ke fakahao mai he moumouaga he fakatokaaga kelea nai! Ko e tokologa fefe he “moto tagata tokologa,” kua ailoa e tautolu. (Fakakite. 7:9) Ke fiha e leva he kotofaaga ha tautolu ke fakamatala, kua ailoa e tautolu. Ka e iloa e Iehova. To fakamatala e tala mitaki ke he hana a makonaaga, “ti hoko mai ai e fakaotiaga.”—Mata. 24:14.
5 Kua gahoa e tau aho kua toe, ati hoko mai e aho he Atua. (1 Kori. 7:29a; Hepe. 10:37) Moli ni, “kua tata ainei kia tautolu e fakamouiaga ha tautolu, ka e mamao ke he vaha ne tua mua ai a tautolu.” (Roma 13:11) Aua neke galo kia tautolu e kakano he fakauka fakaatua. Ka e, kia fakamatala fakatepetepe a tautolu ke maeke e tokologa ne manako lahi he mahani tututonu ke logona e fakaalofa hofihofi noa lahi ha Iehova.