Ko e Mahani Fakaalofa ne Fakaohooho a Tautolu ke Fakamatala
1 He Tau Fakamoli a Iehova, kua talahaua a tautolu ko e tau tagata fakamatala makutu ke he fekau he Kautu. (Mata. 24:14) Kua molea ono e miliona ne hakahakau ke he lalolagi katoa; mo e lafilafi ki ai a lautolu fou he magaaho ka kaufakalataha mo tautolu ke fakamatala. Kua fakamau hifo e tau numera fakave ke he tau tagata ne taute e gahua nei.
2 Ko e heigoa ne fakaohooho ai a tautolu ke makai mo e taute e kotofaaga uka nei? Nakai kua toho a tautolu, po ke futiaki he tau koloa tino, po ke tau fakalilifu uho. He magaaho fakamua, tokologa ia tautolu ne matakutaku nukua manatu kua nakai lata, mo e fa amuamu he tau tagata. (Mata. 24:9) Tokologa ne onoono mai ka e nakai maama e mena ne fakaohooho ai a tautolu. Ha ha i ai e kakano lahi ne omoomoi ai a tautolu ke fakauka.
3 Ko e Malolo he Fakaalofa: Ne mailoga e Iesu e poakiaga ne mua atu he talahau ki a tautolu ‘kia fakaalofa atu foki ke he Iki mo e ha tautolu a loto katoa, agaga katoa, manatu katoa, mo e malolo katoa.’ (Mare. 12:30) Ko e fakaalofa ha tautolu ki a Iehova ne vakavaka mai he loto fakaaue kia ia mo e tau mana hana—ko e Pule Katoatoa, ko e Tufuga he tau mena oti, ‘kua lata ni ke tuku atu ki ai e fakahekeaga, mo e lilifu, mo e malolo.’ (Fakakite. 4:11) Ko e tau mahani fulufuluola hana kua nakai fakaai ke fakatai ki ai ha mena.—Esoto 34:6, 7.
4 He iloa mo e fakaalofa e tautolu a Iehova ati omoi a tautolu ke kikila atu ha tautolu a maama ki mua he tau tagata. (Mata. 5:16) Ne kikila atu e maama ha tautolu he fakamatala hagaao ki a ia, talahau hana tau mana, mo e fakapuloa hana a Kautu. Tuga ni e agelu he pulagi, ha nei ia tautolu ‘e vagahau mitaki tukulagi ke fakamatala atu . . . ke he tau motu kehe oti, mo e tau magafaoa, mo e tau vagahua kehekehe, mo e tau motu.’ (Fakakite. 14:6) Ko e fakaalofa ha tautolu ko e malolo ne omoi e gahua fakamatala ke he lalolagi katoatoa.
5 Ne totoku he lalolagi e fakamatalaaga ha tautolu “ko e mena goagoa” ne lata ke fakateaga. (1 Kori. 1:18) Ne loga e tau puhala kua lali ke taofi e gahua ha tautolu. Ka e fakamalolo he fakaalofa fakamoli a tautolu ke fakapuloa atu, tuga ni e tau aposetolo: ‘Ha kua nakai maeke ke fakamamate a mautolu ke he tau mena ne kitia e mautolu, mo e fanogonogo a mautolu ki ai. . . . Kua lata ni ke mua e omaoma ke he Atua ke he omaoma ke he tau tagata.’ (Gahua 4:20; 5:29) Ka e pete ni e taufetoko, ne tolomaki atu fakalahi e fakamatalaaga ke he tau faahi oti he lalolagi.
6 Ko e fakaalofa ha tautolu ki a Iehova kua tuga ne afi kaka ne omoi ai a tautolu ke fakakite atu e mitaki hana. (Iere. 20:9; 1 Pete. 2:9) To hagaaki mau a tautolu ke ‘fakailoa atu ke he tau motu hana tau gahua . . ., kua eke e ia e mena homo atu”!—Isaia 12:4, 5.