Fakamakai e “Tau Mena Fakaalofa ke he Tau Tagata” ke Leveki e Fuifui Mamoe he Atua

¹ Ko e lagomataiaga fakaalofa ha ia ne taute e Iehova he puhala mai he hana Tama ke foaki e “tau mena fakaalofa ke he tau tagata”! (Efeso 4:8, 11, 12) Ha ha ia lautolu e tau matagahua loga, putoia e levekiaga malolo mo e fakamakai ke he fuifui mamoe he Atua. (1 Pete. 5:2, 3) Igatia a tautolu mo e aoga mai he foakiaga manako lahi nei. Pete kua fehagai e falu mo e tau mena uka, fakalataha fou mai, fai lolelole pauaki, po ke tafea kehe ai, ha ha he tau tagata nei e fiafia fakatagata moli ke he tau tuaga fakaagaga he tau tagata oti.​—Filipi 2:4; 1 Tesa. 5:12-14.

² Ka fakahoko he tau mena tutupu fakatupetupe he lalolagi e tuaga he matakutaku, kua taute moli e tau leveki mamoe nei mo “fakamumuliaga mai he matagi, mo e mena ke malu ai ka to e afa.” Ka lolelole po ke pehia a tautolu mo e manako ke he fakamafanaaga, to fakahauhau e lautolu a tautolu, “tuga ne tau vailele ke he motu paku lā, po ke “ke tuga ne malu foki he kau maka lahi ke he motu nakai fai vai.”​—Isa 32:2.

³ Fakamalolo a Lautolu kua Lolelole: Kua lali pauaki e tau motua ke fakamalolo a lautolu ne nakai fakalataha tumau po ke lolelole, he lagomatai a lautolu ke liliu mai ke fakalataha auloa tumau ke he tau gahua he fakapotopotoaga. Ko e tau ahi fakaalofa he levekiaga ne kua lagomatai e tokologa ke fakalataha tumau atu ke he tau feleveiaaga he fakapotopotoaga mo e ati hake fakaagaga ke hokotia ke liu fai vala a lautolu ke he gahua he fonua. Ko e tau laliaga pihia he vala he tau motua kua fakaata e levekiaga fakaalofa ha Iehova mo e takitakiaga malolo ha Iesu Keriso. Ne fakatoka e ia e puhala he fakakite e manamanatuaga pihia ma e hana tau mamoe ne kua tafea kehe po ke galo.​—Mata. 18:12-14; Ioane 10:16, 27-29.

⁴ Kua matakite e tau leveki mamoe ke he tau fakamailoga ka fakakite e liga lolelole fakaagaga he falu. Ha tagata ka fakakite e tau fakamailoga he lolelole, kua nakai fakalataha tumau ke he tau feleveiaaga, po ke fakamanou hifo e gahua he fonua kua lata ma e lagomataiaga fakaagaga. Ko e tau motua kua makai ke lagomatai ha tagata kua kamata ke fakatata e aga fakalalolagi ke he tau tapulu mo e tauteuteaga po ke feaki e aga tuhituhi ke he fakapotopotoaga. Fakalataha e fiafia mo e fakaalofa hohofi moli, ko e tau leveki manamanatu fakamakai ne ‘ta atu e momoui ha lautolu’ he lali ke lagomatai a lautolu ia ke fakamalolo e fakaalofa ha lautolu ma Iehova.​—1 Tesa. 2:8.

⁵ Ne galo he falu he tau Kerisiano tukulele i tuai e matutakiaga mo e fakapotopotoaga, he mokulu ke he nakai gahuahua fakaagaga ha kua lolelole a lautolu ha ko e tau lekua malolo tino, tau kuku fakatupe, po ke tau pehiaaga fakamagafaoa. He nakai tuhituhi, kua fakamafana age he tau motua kua leveki e Iehova hana tau mamoe oti mo e to hahapo e ia a lautolu he tau magaaho uka. (Sala. 55:22; 1 Pete. 5:7) Ko e tau leveki mamoe mataala ke he fuifui mamoe kua lagomatai a lautolu ke mailoga kaeke ke ‘fakatata atu a lautolu ke he Atua, ti fakatata mai ai a ia kia lautolu.’​—Iako. 4:8; Sala. 23:3, 4.

⁶ Ofania a Lautolu kua Lolelole Fuakau: Kua manamanatu foki e tau leveki mamoe fakaalofa ki a lautolu kua nimo. Igatia e fakapotopotoaga mo e falu kua lolelole fuakau, ti uta ai ke he tau kaina ne leveki he tau nosi, po ke kua kulikuli a lautolu. Ko e folafola ha lautolu he fekau he Kautu kua maama ai ke fakakaupa ha ko e ha lautolu a tau tutuaga. Liga ko e magaaho ni ha lautolu ke fakamatala he matutaki mo e tau tagata ahiahi atu, falu he tau tagata gagao, po ko lautolu ne leveki. Moha ia, ko e mena ni kua maeke ia lautolu ke taute kua onoono ki ai ko e lalagoaga aoga ke he gahua fakamatala katoa. (Mata. 25:15) Pete ne fakamatala a lautolu ke 15 ni e minuti, kua lata e mena nei ke fakamau hifo, ti matutaki a lautolu ke totou ko e tau tagata fakailoa tumau he Kautu.

⁷ Ko e “tau mena fakaalofa ke he tau tagata” kua mahomo atu e mataala ke he tau manako fakaagaga he tau matakainaga ha lautolu he magaaho nei he tau​—ko e magahala Fakamanatuaga. Ko e magaaho kua latatonu ma e tau motua ke taute e laliaga pauaki ke lagomatai a lautolu kua tafea kehe ke liu foki logona e olioli mo e mafola he manamanatuaga he ha ha ai fakalataha mo e feoaki mafanatia he fakapotopotoaga! Nukua olioli a tautolu ka kitia e tautolu a lautolu ia kua ‘faoa mo tautolu ke he tua’ kua fakalataha ke he tau feleveiaaga he fakapotopotoaga mo e o he fekafekauaga, he liu fakamoli e tua ha lautolu ke he poa lukutoto.​—Kala. 6:10; Luka 15:4-7; Ioane 10:11, 14.