Ko e Fefakamafanaaki Pauaki
1 Kua fehagai e tau tagata ha Iehova he tau aho takitaha mo e tau kamatamata he tua ha lautolu. He iloa he Tiapolo na ku e magaaho hana, hane fa e taute e ia e tau favaleaga fakahiku ke moumou e fakamoli ha tautolu ki a Iehova. (Fakakite. 12:12) Kua aoga ia tautolu ke “fakamalolo . . . ke he Iki ke he malolo he hana mana” ke maeke ia tautolu ke “totoko atu ka hohoko ke he aho kelea, ka oti e tau mena he eke e [tautolu], ti tumau ai ni.”—Efeso 6:10, 13.
2 Ko e fakalataha mo e tau matakainaga fakahele ko e foakiaga mai ia Iehova ke lagomatai a tautolu ke moua e malolo. Ne loto fakaaue e aposetolo ko Paulo ke he mena nei. Ne manako lahi a ia ke fakalataha mo e tau matakainaga Kerisiano hana ke maeke ia lautolu “kia fefakamafanaaki” mo e “ke fakatumau ai.” (Roma 1:11, 12) Ke fakamalolo a tautolu ke taute e finagalo he Atua, kua fakatoka fakaalofa he Kau Fakatufono e magaaho ma tautolu ke aoga mai he fefakamafanaaki ke he Fonoaga Fahimotu “Tau Tagata Fakapuloa Fakamakai he Kautu” hane gutu mai.
3 Fakalataha Atu ke Aoga Ai: Taute mo foliaga hau ke fakalataha atu oti ke he tau aho tolu ia. Kua “aoga ai” a tautolu ke hohoko tuai atu ato lologo fakamua mo e nonofo ke oti e “Amene” mai he tau loto ha tautolu he liogi fakaoti. (Isa 48:17, 18) Tokologa ka lata ke fakatoka tuai e setulu gahua ha lautolu ke maeke ai ke fai magaaho ke o atu ke he tau aho tolu oti ia. Moli, to nakai mukamuka he takitaki gahua hau ke fakatoka atu taha magaaho, ka e ha ha ia tautolu e malolo ha Iehova to lagomatai e ia a tautolu ke taute hana finagalo. (1 Ioa. 5:14, 15) Ka nakai la taute e tautolu, ko e magaaho anei ke taute e tau fakatokatokaaga ke mau ai ma e puhala fenoga mo e mena ke nonofo ai, he nakai amanaki ke moua noa. Maeke ia tautolu ke mauokafua to fakamonuina e Iehova e tau laliaga ha tautolu ke o atu ke he tau aho tolu oti ia.—Fakatai 10:22.
4 Amaamanaki Atu ke he Fefakamafanaaki: Kua toka nakai e koe e fonoaga fahimotu, mo e talahauaga: “Mua atu laia e fonoaga ia!” Ko e ha la ne liga logona pihia a koe? Kakano ni ha ko e tau tagata nakai mitaki katoatoa kua lolelole lahi a tautolu, ti manako lahi ke he fefakamafanaaki fakaagaga. (Isa 40:30) Ne fakamaama he taha matakainaga fifine: “Fakapehia he tau mena fakalalolagi nei au, ti liu e tau fonoaga fakahako haku onoonoaga fakaagaga, he foaki mai ki a au e malolo fakaagaga kua lata. Kua tuga na hau e fakamafanaaga he magaaho kua lata tonu ki a au.” Liga logona pihia foki a koe.
5 Kua moua e tautolu e fakamafanaaga kua lata he nakai ni ke he puhala he tau lauga mo e tau fehuhuaki ka e pihia foki mo e falu atihake fakaagaga he tau fonoaga ha tautolu. Ne talahau he taha matakainaga tane: “Ko e gahuahuaaga maama mo e aoga he tau matapatu fakaakoaga he Tohi Tapu kua loto fakaaue moli au ki ai. Moli, ko e taute tala kua mua atu e aoga he fakakite e tau puhala ke lagomatai aki a tautolu mai he tau fakafifitakiaga i tuai, kua mitaki mo e kelea. Ko e tau tohi ne fakatoka mai ko e taha mena kua amaamanaki lahi au ki ai, ti olioli e au he leva e hoko atu ki kaina.”
6 Ko e tau foakiaga aoga e tau fonoaga mai ia Iehova he ‘tau aho fakamui nei kua uka.’ (2 Timo. 3:1) Kua lagomatai mai a tautolu ke fakateliga ke he tomatomaaga he agaga: “Kia mataala . . . , kia tumau a mutolu ke he tua, kia eke a mutolu mo tau tagata toa, kia fakamalolo a mutolu.” (1 Kori. 16:13) Ko e mena ia, kia fifili a tautolu ke o atu katoa he magaaho ia mo e olioli e fefakamafanaaki ke he ha tautolu a Fonoaga Fahimotu “Tau Tagata Fakapuloa Fakamakai he Kautu”!
[Puha he lau 3]
Fakatoka ke O Atu he Tau Aho Tolu Oti Ia
■ Ole ma e magaaho ke hoko atu.
■ Fakamau e nofoaga he matakavi ka fono ai.
■ Fakatoka e puhala fenoga ke he fono.