Ko e Ole Fakamakai ke Mailoga e Warning Examples for Our Day
Kua maeke ia tautolu oti ke fakamalolo e mauokafua ha tautolu ke fakatumau e fakamoli, he uta ke he tau loto e tau fakaakoaga ne ako mai he taute tala he Tohi Tapu ne fakakite mai he vitio Warning Examples for Our Day. Fakamua to kitekite e koe e ata nai, fakamolemole totou e Numera veveheaga 25 mo e tau fakamaamaaga he tohi Insight on the Scriptures, Volume 2, lau 419, paratafa 3-5. Ti tali e tau huhu nai: Ko hai e tau Moapi, mo e ko e ha ne tala age a Iehova ki a Mose ke nakai tau atu ki a lautolu? (Teu. 2:9) Ko e tau lagatau fefe ha Palaamo ne fakaaoga ke he tau Moapi ke moumou aki e motu ko Isaraela? Ko e ha kua nakai lata a tautolu ke nimo na tokologa e tau Isaraela ne kaumahala he kamatamata aoga lahi he magaaho ne teitei ke huhu atu ke he Motu he Maveheaga?—1 Kori. 10:11, 12.
He magaaho ka kitekite ai e vitio Warning Examples, manamanatu ke he fa e fahi nai he tau momoui ha tautolu kua lata tonu ke onoono fakahokulo ki ai he vaha nai kaeke ke fakakite e tua fakamoli mo e ke olioli e taliaaga he Atua. (1) Aga: Fakakite fefe he falu Isaraela kua hepe e aga ha lautolu ki a Iehova mo e hana tau fakatokatokaaga? Ka e, ko e heigoa e aga nukua lata ia tautolu ke lali ke fakakite? (2) Tau Lafiaga: Ko e ha ne nakai manako a Iehova ke kapitiga e tau Isaraela mo e tau Moapi? (Esoto 34:12; Fakatai 13:20) Ko e ha kua latatonu ke fifili fakalotomatala e tau kapitiga ha tautolu? (3) Tau Mahani: Ko e heigoa e tau agahala lalahi ne takitaki atu he tau lafiaga kelea e kavi ke 23,000 he tau Isaraela? (1 Kori. 10:8) Ke he vaha nei, ko e heigoa ne fakataki aki e falu tagata he Atua ke taute e mahani feuaki, ka e maeke fefe a tautolu ke puipui a tautolu ni? (4) Tapuaki: Kamatamata fefe e tau Isaraela ke he mea he tapuakiaga ha lautolu? Ko e heigoa e tau vahega tapuaki tupua halahu ne liga mahala e falu ki ai he vaha nei, ka e kalo kehe fefe a tautolu mai i ai?—Kolo. 3:5.
Ke he taute tala nai, kua fakamonuina fefe a Iaminu ha ko e hana a mahani fakamoli? He puhala mai he vitio nai, ko e heigoa e ole fakamakai he Kau Fakatufono ke he tau Kerisiano moli oti? Kaeke ko koe ko e ulu he magafaoa, ko e ha kua logona hifo e koe to liga pulotu ma e magafaoa hau ke kitekite e fakaholoaga nai ti liu foki ti liu foki?