Ko e Vitio ka Fakamaama mo e Fakaohooho a Koe!
Ia Aperila 1951. Totou afe e Tau Fakamoli a Iehova he Kautaha Soviete fakamua—tau magafaoa katoa—ne fakapotopoto fakalataha, tuku he tau puha motoka, mo e fakapaea ki Siperia. Ko e ha kua maofe ai e fakatufono malolo ha Soviete ke ulu moumou a lautolu? Kautu fefe e tau matakainaga ha tautolu ti hokotia foki ke monuina pete kua loga e tau hogofulu tau ne kaka e favaleaga? To moua e koe e tau tali he vitio Faithful Under Trials—Jehovah’s Witnesses in the Soviet Union. Kitekite ki ai, ti eke e tau fakamaamaaga ia mo fakaohoohoaga ki a koe ke tumau e tua fakamoli ki a Iehova, ko e heigoa ni e tau mena ka tutupu!
Maeke nakai ia koe ke tali e tau huhu nai? (1) I ne fe fakamua ne hafagi matafakatufono e Tau Fakamoli a Iehova i Rusia? (2) Ato kamata mo e he oti e Felakutaki II he Lalolagi, puhala fe ne holo atu ke totou afe ai e tau magafaoa Fakamoli ne nonofo he Kautaha Soviete? (3) Puhala fe ne nakai tatai e tau taofiaga ha lautolu mo e tau fakaakoaga pulotu ha Lenin? (4) Ko e heigoa e Operation North, mo e ko e heigoa ne amanaki a Stalin ke moua mai he tauteaga ia? (5) Ko e heigoa e kakano he paeaaga ma e Tau Fakamoli, mo e ko e heigoa ne tala age ki a lautolu ke taute ti to nakai uta fakapaea a lautolu? (6) He fenoga loa he tuleni ki Siperia, fefakamafanaaki fefe e tau matakainaga ha tautolu mo e fakaofo e tau tagata ne tapaki a lautolu? (7) Ko e heigoa e tau matematekelea ne fakauka e Tau Fakamoli ki ai i Siperia? (8) Ko e heigoa e tau foakiaga fakaagaga ne tokiofa fakatokoluga he tau tagata ha Iehova, mo e ko e ha? (9) Ko e ha kua talia e lautolu ke fakahagahagakelea ha lautolu a tau momoui ma e tau tohi fakaagaga, mo e taute fefe e lautolu mai he tau laliaga mao kikiha he tau pule he motu ke puipui a lautolu ke ua moua e tau mena ia? (10) Matutaki fefe a Khrushchev ke totoko ke he tau tagata he Atua? (11) Puhala fe he tau takitaki fakatufono ne lali ke moumou e tua he tau fanau Fakamoli? (12) Ko e heigoa e maamaaga mahino he tau matakainaga ke he kakano ne fakamatematekelea ai a lautolu? (2002 Yearbook, lau 203-4) (13) Puhala fe he tau laliaga oti ke totoko ke he fakatokatokaaga he Atua ne liu ni mafuluhi atu ke he tau tagata ne fakatu e favaleaga? (2002 Yearbook, lau 220-1) (14) Ko e heigoa he Tau Fakamoli he Kautaha Soviete fakamua ne fa miti ki ai he taha vaha ka e kua fakamoli ai? (15) Ko e heigoa ati kautu ai e tau matakainaga ha tautolu mai he tau kamatamata, mo e fakakite fefe he vala fakahiku he vitio e moli he Ieremia 1:19? (16) Talahau taha mena ne tupu moli he moui mai he tua fakamoli pete i lalo hifo he favaleaga kua fakaohooho lahi ki a koe.