Puhala ne Fakatokanoa he Kupu Moli a Tautolu
1 Ke he taha magaaho tonu, ne pehe a Iesu ke he tau Iutaia ne talitonu ki a ia: “To iloa foki e mutolu e mena moli, ko e mena moli foki ke toka noa ai a mutolu.” (Ioane 8:32) Ne tutala a ia ke he tokanoaaga ne mua hake ke he tau ataina mitaki noa ni, ko e tokanoaaga kua fakaata ma e tau tagata oti kana—monuina po ke mativa, tau tagata kua fakaako po ke nakai fakaako. Ne fakaako e Iesu e kupu moli ka tamai e tokanoaaga mai he lili he hala mo e mate. Ne fakamaama e Iesu, “ko e tagata kua hala ke he mena kua eke ko e tupa he hala a ia.” (Ioane 8:34) Kua manako moli a tautolu ke he magaaho ma e tau tagata omaoma ka “toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua”!—Roma 8:21.
2 Ko e kupu moli hagaao ki a Iesu mo e hana gahua ke fakakatoatoa e finagalo he Atua ka tamai e tokanoaaga pihia. Putoia ai foki e iloilo ke he poa lukutoto ne foaki e ia ke hukui aki a tautolu. (Roma 3:24) Pihia foki he mogonei, he talia mo e muitua ke omaoma ke he kupu moli he Tohi Tapu kua fakamalolo a tautolu ke olioli e fai tokanoaaga mai he matakutaku, fakaatukehe, mo e tau gahua fakamamahi kehekehe.
3 Tokanoaaga Mai he Matakutaku mo e Fakaatukehe: Kua nakai lata a tautolu ke fakaatukehe ha ko e tuaga he lalolagi ha kua maama ia tautolu e kakano ati tutupu e tau mena kelea mo e iloa e tautolu to nakai leva to tatafi kehe mai he lalolagi. (Sala. 37:10, 11; 2 Timo. 3:1; Fakakite. 12:12) Ke lafi ki ai, kua fakatokanoa he kupu moli a tautolu mai he tau fakaakoaga fakavai hagaao ki a lautolu ne mamate. Kua iloa e tautolu nakai maeke a lautolu ne mamate ke fakamamahi a tautolu, ti nakai matematekelea a lautolu he fakakikiveka tukulagi, mo e nakai uta noa ni he Atua e tau tagata ke mamate ke fakalataha mo ia ke he kautu fakaagaga.—Fakama. 9:5; Gahua 24:15.
4 Ko e kupu moli pihia ne fakakautu aki e matua tane mo e matua fifine he magaaho ne mate e tama ha laua he pakia. “Nakai fai mena ke fakapuke aki e takoko he tau momoui ha maua ato liu a maua ke kitia e tama tane ha maua ke he liu tu mai,” he talahau he matua fifine. “Ka e iloa e maua to nakai leva e mamahi ha maua.”
5 Tokanoaaga Mai he Tau Gahua Fakamamahi: Maeke he kupu moli he Tohi Tapu ke liliuina e manamanatuaga mo e aga he tagata, ti fakahiku ke tokanoa mai he tau lekua ne maeke ke kalo kehe mai ai. (Efeso 4:20-24) Mai he taute e mahani fakamoli mo e fakamakutu to lagomatai ke fakatote hifo e mativa. (Fakatai 13:4) He fakakite e fakaalofa foaki noa to fakatupu ki mua e fakafetuiaga mitaki mo e falu. (Kolo. 3:13, 14) He fakalilifu e ulu pule Kerisiano to fakatote hifo e tau lekua fakamagafaoa. (Efeso 5:33–6:1) He fakamamao mai he konahia, feuaki, tapaka, mo e tau tulaki hufia kua fakatupu ki mua e tino malolo.—Fakatai 7:21-23; 23:29, 30; 2 Kori. 7:1.
6 Ko e fuata tane ne kua uka ke fakaoti mai e hufia he tulaki ke he hiva e tau tau. Ke he taha aho ne feleveia a ia mo e tagata fakailoa ne gahua fakamatala ke he puhala tu. Ne talia e ia e tau tohi, mo e fakatoka ke aahi atu ki a ia he kaina hana. Ne kamata e fakaakoaga Tohi Tapu. Ua e mahina he mole ne fakaoti katoatoa e fakaaoga tulaki he tagata tane, ti mole e valu e mahina he fakaako ai, ne papatiso a ia. Ne kitia he taokete mo e hana hoana a ia kua fakaoti mai e hufia hana ne fakaohooho a laua ke kamata fakaako e Tohi Tapu.
7 Lagomatai e Falu ke Moua e Tokanoaaga: Ko lautolu ne leva e lili he tau fakaakoaga fakavai to liga uka ke iloa e tokanoaaga ne foaki mai he Kupu he Atua. Ke hokotia ke he tau loto ha lautolu kua lata pauaki e vala he faiaoga ke fakamakamaka mo e tauteute fakamitaki. (2 Timo. 4:2, 5) Nakai ko e magaaho a nai ke fakamanou e gahua ha tautolu he ‘fakamatala e vagahau mitaki ki a lautolu ne lili.’ (Isaia 61:1) Kua uho e tokanoaaga faka-Kerisiano. He moua ai kua kakano ko e moui tukulagi.—1 Timo. 4:16.