Puha Huhu

◼ Ko e heigoa e tau hatakiaga kua lata ia tautolu ke mailoga ka fakamatala ke he tau pagota he tau fale puipui?

Ke he lalolagi katoa kavi ke valu e miliona he tau pagota he tau fale puipui, ko e falu kua fakakite e fiafia ke he kupu moli. (1 Timo. 2:4) Taha e la matapatu ofisa ne moua he tau mahina takitaha kavi ke 1,400 e tohi mai he tau pagota mo e ha lautolu a tau tagata he magafaoa ke ole tohi po ke manako ke ahi tino atu ki ai. Pete kua tokologa e pagota ne fiafia moli, kua fai tuaga ne kitia e fiafia fakatupua he falu, he kumi ke fakaaoga lotokai e tau tagata he Atua. Ha ko e mena ia, kua lata ai ia tautolu oti ke mailoga e tau hatakiaga nei ka fakamatala ke he tau pagota he tau fale puipui.

Ke he loga he tau magaaho kua fakamatala ke he tau pagota he puhala tohitohi. Kua peehi malolo ke nakai tohitohi e tau matakainaga fifine ke he tau pagota tane, pete ko e foliaga ke foaki e lagomatai fakaagaga. Ko e kotofaaga ia kua lata ke taute ni he tau matakainaga tane kua lata. Ko e tau matakainaga fifine kua lata to liga kotofa ke tohitohi ke he tau pagota fifine ne fakakite e fiafia moli ke he kupu moli he Tohi Tapu. Nakai lata ke fakafano tupe po ke tau mena fakaalofa fakatagata ke he tau pagota, pete ka ole ke he tau mena pihia.

Ka fakakite he tagata he fale puipui e fiafia, ko e higoa mo e kaina hana kua lata ke ta atu ke he fakapotopotoaga he matakavi ia ne tata ke he fale puipui. Kua fa mahani e tau matakainaga tane kua lata he matakavi ia ke iloa e lautolu e puhala ke fakafehagai mo e tau tutuaga kehekehe ka liga tupu mai ai. Kaeke nakai iloa tonu e fakapotopotoaga, kua lata ke fakafano atu e tau vala tala hagaao ki a ia ke he la matapatu ofisa.

Kua nakai hepe ma e tau matakainaga tane kua kotofa ke taute e tau feleveiaaga mo e tau pagota ke tokologa ka fakaako he taha e magaaho. Pete ia, ko e tau magaaho pauaki ne fa lafi auloa e tau tagata fakailoa mo e tau pagota kua nakai lata ke taute i loto he tau fale puipui. Fakalaulahi atu ai, nakai ko e fifiliaga lotomatala ma e tau tagata fakailoa ke ahiahi fakahanoa atu ke he fale puipui mo e lafi fakatata mo e tau pagota.

Kia “loto matala a [tautolu] tuga e tau gata, kia totonu foki tuga e tau lupe” he fakamatala e tala mitaki ke he tau pagota he tau fale puipui.​—Mata. 10:16.