Lata e Fekafekauaga ha Tautolu mo e Fakailoilo Faka-Kerisiano
1 Ko e fakamaamaaga ke he fakailoilo ko e “aga makau ke he taha mena ka taute po ke talahau ke fakatumau aki e matutakiaga mitaki mo e falu po ke kalo mai he fakaita.”
2 Ko e fakailoilo faka-Kerisiano kua lata ke lagotatai mo e mauokafua. Kua nakai lata ke fakahui e kupu moli po ke fakalolelole ke kalo hola. Ma e falu, ko e fekau he Tohi Tapu, pete ko e ha puhala fe ni ka talahau aki, to fakaita ai.
3 Fakalaulahi atu ai, ko e fakailoilo faka-Kerisiano kua omoomoi ai he tau fua he agaga he Atua. (Kala. 5:22, 23) Nakai taute he fakaalofa e fakahogohogo manava. Ko e tagata mahani totonu to fehagai totonu mo e falu. Ko e taha ne moua e mahani taofi ni to tumau ke fakatotoka ke he tau tutuaga kamatamata, ko e lauiaaga mitaki ne kua fakakite mai he Tau Fakatai 15:18: “ko ia ne mahani ke fakauka kua fakamitaki ai e ia e taufetoko.”
4 Hanai e tau lagomataiaga kua foaki ke fakamanatu mai ke fakailoilo ke he fekafekauaga:
◼ Peehi e tau mena mitaki he fekau he Tohi Tapu.
◼ Eketaha ke fakatoka e tuaga kua tatai a mua ki ai.
◼ Ua fefeua po ke fakaheu, neke mataofi e manamanatuaga he tagata he kaina.
◼ Kia eke mo tagata fanogonogo mitaki. Ua fofo e fakatutalaaga.
◼ Manamanatu ke he talahauaga he taha tagata.—1 Kori. 9:20-22.
◼ Lata ke fakailoilo he magaaho tonu. Falu magaaho kua mitaki ke toka noa ni e tau kupu ne talahau, toka falu manatu ma e taha magaaho foki.—Ioane 16:12.
◼ Nakai lata ke fakatikai e tau totoko oti po ke tau talahauaga nakai moli.
5 Ko e matapatu, nakai lata e taha ke ako manatu e tau matafakatufono loga. Kia manamanatu. Fakakite e fakaalofa. Kia taute atu ke he falu tuga he manako a koe ke taute mai e lautolu kia koe.—Mata. 7:12.