Tuku Mai ki Ai e Tala Mitaki
1 Ko e lilifu ha ia ke tuku mai ki a tautolu e tala mitaki he Atua! (1 Tesa. 2:4) He fakaheu he falu e fekau malolo nei, ne futiaki a lautolu ne loto fakamoli ki ai tuga e manogi fulufuluola. (2 Kori. 2:14-16) Ma lautolu kua talia mo e omaoma e tala mitaki, kua kakano ko e fakamouiaga. (Roma 1:16) Kua lata ke leveki fefe e tautolu e foakiaga nei?
2 Ko Iesu mo e Tau Aposetolo: Ne tuku fakamua e Iesu e fakapuloa he tala mitaki. (Luka 4:18, 43) Pete ni he lolelole mo e hoge a ia, ko e fakaalofa hana ma e tau tagata mo e loto fakaaue hana ma e fekau ne omoi a ia ke folafola atu ke he falu. (Mareko 6:30-34) He talahau mo e taute, ne peehi e ia ke he tau manamanatuaga he tau tutaki hana e aoga he gahua fakamatala he Kautu.—Mata. 28:18-20; Mareko 13:10.
3 He fifitaki a Iesu, ne fakapuloa fakamakai he tau aposetolo e fekau he Kautu. Pete ni he tafolo mo e poaki ke oti e fakamatala ‘kua nakai oki foki a lautolu he fakaako mo e fakamatala e tala mitaki.’ (Gahua 5:40-42) Ne gahua malolo e aposetolo ko Paulo ke he gahua nei. (1 Kori. 15:9, 10; Kolo. 1:29) Ne fakatatai e ia e kotofaaga he folafola e tala mitaki ke he kaitalofa ne ole ke he tau matakainaga hana, ti talia e ia ke toka e tuaga fakatagata ke maeke ke fakamoli ai.—Gahua 20:24; Roma 1:14-16.
4 Ko e Kotofaaga ha Tautolu he Vaha Nei: Ko e loto fakaaue ma e poakiaga tapu nei ne tuku mai ki a tautolu ka omoi a tautolu ke kumi puhala ke fakalaulahi e fai vala ha tautolu a fakalataha ke he gahua fakamatala. (Roma 15:16) Ko Edward, ne fakaaoga e nofoa fakataveli, ne fa nofo he gutuhala he hotela mo e tutala ke he tau tagata ne nonofo i ai hagaao ke he tua hana. He manako ke lahi e mena ka taute, ne ha ha ia ia e poko pauaki ne talaga ke he tulaki, ti he puhala nei, ne paionia a ia ke he loga e tau tau, he totou afe e tau maila he fenoga ai. Tuga a Edward, tokologa he vaha nei ne hikihiki e tau tutuaga ha lautolu ke lahi atu e magaaho ke folafola e tala mitaki.
5 He fifitaki ki a Iesu mo e tau aposetolo, kia tuku fakamua tumau e tautolu he vaha nei e gahua fakamatala he tau momoui ha tautolu. He taute pihia, kua fakatata e tautolu e fakaalofa ma e tau tagata ti pihia mo e loto fakaaue ha tautolu ke he tala mitaki ne tuku mai ki a tautolu.