Maeke Fefe ia Tautolu ke Lagomatai e Tau Hoa ne Nakai ko e Fakamoli?

¹ Tokologa e tau fekafekau ha Iehova kua mau ke he tau hoa ne fiafia ke he tau matakainaga mo e fiafia ke he fakapotopotoaga ka e mataofi ke eke mo tau fekafekau he Atua. Taha e tane ne talahau: “Ko e manatu ke fano he taha fale ke he taha fale kua fakatauhele lahi ki a au.” Falu kua liga fai matagahua nakai faka-Tohi Tapu ne lata ia lautolu ke fakakautu mai i ai, po ke liga manatu hifo a lautolu to nakai maeke ia lautolu ke fakatumau ke he setulu fakateokarasi lavelave ke tuga he tau hoa ha lautolu. Puhala fe kua maeke ia tautolu ke lagomatai a lautolu?

² Fakakite e Fiafia Fakatagata: Ko e fakakite e fiafia fakatagata ke he falu mo e mailoga ha lautolu a tau kapaletu ka liga hafagi e puhala ma lautolu ke talia e kupu moli he Tohi Tapu. (Filipi 2:4) Ko lautolu ne nakai fakalataha ke he tua he tau hoa ha lautolu he magaaho fakamua kua fa talahau e fakaalofa fiafia ne fakakite he falu ki a lautolu. “Ko José, ko e motua he fakapotopotoaga, ne fakakite e fiafia pauaki ki a au,” he fakamaama he tane ne talahau i luga. “Manatu au ko e fakamafanaaga hana ati kamata ai au ke fakaako fakahokulo he mogo fakahiku.” Taha e tane ne manatu e tau matakainaga tane ne ahiahi atu he lali ke tutala hagaao ke he tau mena ne fiafia a ia ki ai. “Ne kamata agataha au ke kitia e tua he [hoana haku] mai he onoonoaga kehe mamao,” he talahau e ia. “Ko e tau kapitiga hana kua to lahi e iloilo he kehekehe e tau vala tala kua tutala ki ai.”​—1 Kori. 9:20-23.

³ Foaki e Lagomatai Moli: Ko e tau hoa ne nakai ko e Fakamoli kua liga aamohia he lagomatai fakaalofa ne foaki ki a lautolu. (Fakatai 3:27; Kala. 6:10) Magaaho ne malona e motoka he tane nakai talitonu, ne lagomatai he taha fuata Fakamoli a ia. “Kua nava moli au ke he mena ia,” he talahau e ia. Taha matakainaga tane ne fakaaoga taha e aho katoa ke lagomatai e tane nakai talitonu he matakainaga fifine ke talaga e pa he fonua hana. He tutala tokoua he magaaho ne gahua ai, kua feaki e laua e fakafetuiaga kapitiga. Ua e fahi tapu he mole, ne fano a ia ke he matakainaga tane mo e pehe: “Kua hoko tuai e magaaho ke taute e au e tau hikihikiaga ke he moui haku. Maeke nakai ia koe ke fakaako e Tohi Tapu mo au?” Ne mafiti e tolomaki ki mua hana ti kua eke a ia mogonei mo Fakamoli kua fakauku.

⁴ He tumau a tautolu ke kumi a lautolu ne kua lata he matakavi ha tautolu, kia matutaki a tautolu ke lagomatai a lautolu ne mau mo e tau matakainaga talitonu.​—1 Timo. 2:1-4.