Ko e Aoga Ka Lagomatai a Tautolu ke Fakagahua Fakamitaki
1 He fakatutala a tautolu ke he Setulu he Aoga Fekafekau Fakateokarasi ma e 2006, to eketaha a tautolu ke aoga mai he tau fakaakoaga faka-Tohi Tapu he fakagahua e tau talahauaga ia ke he ha tautolu a fekafekauaga tapu mo e tau aho takitaha he moui ha tautolu. To eketaha a tautolu ke fakagahua e tau mena ne ako e tautolu.—Ioane 13:17; Filipi 4:9.
2 Foaki e Tau Talahauaga: Ke he setulu he tau nei kua tuku foki taha e minuti lafi ki luga ma e tau tali mai he tau tagata fanogonogo ke lata mo e fakamaamaaga he Tohi Tapu. Kakano e mena nei ko e matakainaga tane ka kotofa ke taute e fakamaamaaga hana kua lata ke oti he lima e minuti ka e nakai ono. Ko lautolu ka foaki e talahauaga mai he tau nonofoaga ha lautolu kua lata ke tokaloto foki e tula ha lautolu. He manamanatu tuai, ko ia ne fai talahauaga to maeke ke talahau ai e tau vala tala aoga ke he 30 e sekone po ke ku hifo. Kua lata ke kavi ke he hogofulu e tagata ka foaki e tau tali kakano ke he lima minuti ne kotofa ke tali e tau tagata fanogonogo.
3 Tau Lauga Ka Fakaako: Ko e fakamaamaaga mai he Tohi Tapu mo e lauga fakaako kua lata ke hagaaki ke he aoga he vala tala ka fakagahua ke he fekafekauaga ha tautolu mo e falu fahi he tau momoui ha tautolu he tau aho takitaha. Kua lata e tagata lauga ke nakai fakaalaala ni he tau tagata fanogonogo hana ka e fakaohooho a lautolu ke manako ke taute. Kua lata ia ia ke fakamahino e tau mena kua lata ke taute, fakakite e puhala ke taute aki, ti talahau e tau mena aoga he taute pihia. Liga lata ke talahau pehe, “Hanei e puhala kua foaki mai he kupu tohi nei e takitakiaga ma tautolu,” po ke “Hanei e puhala ka liga fakaaoga e tautolu e tau kupu nei he fekafekauaga.” Ko e tau motua mo e tau fekafekau lagomatai ne iloa e tau tutuaga he matakavi kua lata ke eketaha ke talahau fakatonu e tau puhala ke fakaaoga aki e vala tala.
4 Ko e talahau he tau fakafifitakiaga he Tohi Tapu kua mua e lauia mitaki ka talahau e puhala ke fakagahua fakamitaki aki. Ka oti e talahau he fakafifitakiaga he Tohi Tapu, maeke e tagata lauga ke pehe, “Liga to feleveia foki a koe mo e tuaga kua pihia.” Kua lata ia ia ke iloa moli kua lautatai e puhala kua fakaaoga aki e ha fakafifitakiaga he Tohi Tapu mo e vala tala, mo e Tohi Tapu katoa, mo e tau mena kua fita e taute fakailoa he “fekafekau fakamoli mo e loto matala.”—Mata. 24:45.
5 Ko e pulotu kua maeke ai ke fakaaoga fakamitaki e iloilo mo e maama. ‘Ko e pulotu ko e mena ne mua ue atu.’ (Fakatai 4:7) He tupu a tautolu ke he pulotu tonu mai he tau fakaakoaga ha tautolu he Aoga Fekafekau Fakateokarasi, kia fakaholo ki mua foki e puhala ha tautolu ke talahau atu ai ke he falu.