Fakalataha Oti ke Taute Tutaki Foou
1 Ne nakai moua e tutaki foou ha ko e lali tokotaha he tagata. Maeke ia Iehova ke fakaaoga haana “tau ekegahua” oti ke lagomatai e tau tagata fakaako Tohi Tapu ke tupu fakaagaaga. (1 Kori. 3:6-9) Igatia a tautolu mo e lagomatai a lautolu ne foou ke he tau tali mai he loto he tau feleveiaaga Kerisiano ti pihia foki mo e mahani mitaki ha tautolu, nukua kitia maaliali kua gahuahua e agaaga he Atua he tau momoui ha tautolu. (Ioane 13:35; Kala. 5:22, 23; Efeso 4:22, 23) Ko e heigoa foki ka taute ke lagomatai a lautolu ne foou?
2 Ko e Fakapotopotoaga: Igatia a tautolu mo e fakatātā e fiafia ki a lautolu kua kamata ke o mai ke he tau feleveiaaga he fakailoilo ke fakafeleveia mafanatia ki a lautolu mo e ke tutala mo lautolu ato kamata mo e ka hili e feleveiaaga. He liu manatu e matutaki fakamua haana mo e fakapotopotoaga, ne pehē taha tagata taane: “Ne tokologa e tagata fakaalofa mooli ne feleveia mo au he taha e aho ka e nakai pihia he lotu ne feaki hake ai au. Maaliali ai kua moua tuai e au e kupu mooli.” Ne papatiso a ia fitu e mahina he mole e fina atu ke he feleveiaaga fakamua haana.
3 Kia nava mooli ke he holo ki mua fakaagaaga he tagata fakaako Tohi Tapu. Kua fakauka kia a ia ke he totokoaga? Hane fakalataha tumau kia a ia ke he tau feleveiaaga? Kua fakamalolō kia a ia ke fai tali? Kua hū kia a ia he Aoga Fekafekau Fakateokarasi po ke kamata ke gahua he fekafekauaga? Nava ki a ia ha ko e holo ki mua haana. To atihake mo e fakamalolō he mena nei a ia.—Fakatai 25:11.
4 Ko e Takitaki Fakaakoaga Tohi Tapu: Kua maeke he falu tagata fakailoa ke lagomatai e tau tagata fakaako Tohi Tapu ha lautolu ke mahani mo e falu tagata he fakapotopotoaga he ole ke he falu tagata fakailoa ke ō mo lautolu ke he fakaakoaga. Uiina tuai e tagata fakaako ke he tau feleveiaaga he fakapotopotoaga. Ka kamata a ia ke fakalataha ke he tau feleveiaaga, kia fakamahani ke fakafeleveia atu a ia ke he falu. Hane taufetului kia a ia ke kautū mai he aga kelea, tuga e ula? Fai tagata kia he magafaoa haana ne totoko e fakaako haana? Liga lagomatai ki a ia he tutala ke he tagata fakailoa ne fehagai ti kautū ke he paleko pihia.—1 Pete. 5:9.
5 Lata a lautolu ne foou mo e lalagoaga fakaagaaga mai he fakapotopotoaga. Igatia mo e lalago a lautolu ke holo ki mua ha ko e fakatātā e fiafia mooli fakatagata.