Puha Hūhū
◼ Talia nakai he “fekafekau fakamoli mo e loto matala” e tau matakau he Tau Fakamoli ne feleveia ke kumikumi po ke fetoko ke he tau Tohiaga Tapu?—Mata. 24:45, 47.
Nakai, ai talia. Ka e, he tau faahi kehekehe he lalolagi, kua gahoa e tau tagata he fakatokatokaaga ha tautolu ne kua fakatū e tau matakau ke taute e tau kumikumiaga ni ha lautolu ke he tau matakupu hagaao ke he Tohi Tapu. Ko e falu kua fakatū e matakau ke kumikumi ke he Tohiaga Tapu Heperu mo e Heleni ke fokifoki e hakotika he New World Translation. Ko e falu kua kumikumi ke he tau matakupu fakasaiene ne hagaao ke he Tohi Tapu. Ne talaga e lautolu e tau faahi Web mo e tau poko tutala ke feutaaki mo e fakafetoko ke he tau onoonoaga ha lautolu. Kua fakahoko foki e lautolu e tau fonoaga mo e lolomi e tau tohi ke fakakite aki e tau mouaaga ha lautolu ti kua lafi atu ai ke he tau foakiaga ne puhala mai he tau feleveiaaga Kerisiano mo e tau tohi ha tautolu.
Ke he lalolagi katoa, ko e tau tagata ha Iehova kua moua e tau fakaakoaga mo e tau fakamalolōaga fakaagaaga loga mai he tau feleveiaaga he fakapotopotoaga, tau toloaga, mo e tau fonoaga, mo e puhala mai foki he tau tohi he fakatokatokaaga ha Iehova. I lalo hifo he takitakiaga he haana agaaga tapu mo e fakavē ke he Kupu mooli haana, kua foaki e Iehova e tau mena kua lata ke maeke he tau tagata oti he Atua ke “fakalataha [ai] ke he loto taha mo e manatu taha” mo e mauokafua ke “fakatumau ke he tua.” (1 Kori. 1:10; Kolo. 2:6, 7) Kua loto fakaaue mooli a tautolu ma e tau foakiaga fakaagaaga ha Iehova he tau aho fakahiku nei. Ti, nakai talia he “fekafekau fakamoli mo e loto matala” ha tohi, tau feleveiaaga, po ke tau faahi Web ne nakai taute po ke fakatokatoka i lalo hifo he takitakiaga ha lautolu.—Mata. 24:45-47.
Kua nava ki a lautolu kua manako ke fakaaoga ha lautolu a tau manamanatuaga he lalago e tala mitaki. Pete ia, kua nakai lata ke fakatauhele he tutuliaga fakatagata e tau mena kua taute e Iesu Keriso puhala he haana fakapotopotoaga he lalolagi he vahā nei. He senetenari fakamua, ne hataki he aposetolo ko Paulo neke putoia ke he tau vala tala loga ne moumou magaaho, tuga e “tau matohiaga kua nakai fai fakahikuaga, ko e tau mena ia ke tutupu ai e tau taufetoko, ka e nakai ko e fakamafanaaga mai he Atua ha ha he tua.” (1 Timo. 1:3-7) Kua lata e tau Kerisiano oti ke “kalo kehe mo e tau kumiaga goagoa, mo e tau matohiaga, mo e tau miha, mo e taufetoko ke he fakatufono, ha ko e tau mena nakai aoga ia, to fakateaga.”—Tito 3:9.
Ma lautolu ne manako ke fakaako mo e kumikumi fakalahi, kua pulega atu a mautolu ke kumi ke he Insight on the Scriptures, “All Scripture Is Inspired of God and Beneficial,” mo e falu tohi ha tautolu, tuga e tau tohi ne tutala ke he tau perofetaaga he tau tohi he Tohi Tapu ia Tanielu, Isaia, mo Fakakiteaga. Kua loga lahi e vala tala kua foaki he tau tohi nei ke fakaako mo e manamanatu fakahokulo ke he Tohi Tapu, ke maeke ia tautolu ke ‘puke ke he maama mitaki ke he finagalo he Atua, ke he pulotu oti katoa mo e loto matala kua fakalata ke he agaga. Kia mahani a tautolu ke lata mo e Iki, kia fiafia mai a ia kia tautolu ke he tau mena oti; kia fua mai ai a tautolu ke he tau gahua mitaki oti; kia tupu foki ha tautolu a maama mitaki ke he Atua.’—Kolo. 1:9, 10.