Fakaaoga Fakailoilo e Tohi Tapu
1. Ko e ha ne aoga lahi e Tohi Tapu?
1 Ko e fakaaoga fakailoilo he Kupu omoomoi he Atua kua fakamalolō a tautolu ke fakailoa mo e fakaako e kupu mooli ke he puhala maama mo e fakatapakupaku e tau fakaakoaga fakavai mo e tau taofiaga he tau tagata.—2 Timo. 2:15; 1 Pete. 3:15.
2. Ko e heigoa ka lagomatai a tautolu ke moua e tau kupu tohi mo e lotomatala lahi?
2 Fakatupu ki Mua e Iloa Mitaki Haau: He tuga ni e fakaaoga he ha kanavaakau, kua moua e lotomatala ha ko e tupu ki mua he iloa mitaki. Ko e totou katoa e Tohi Tapu kua foaki ki a koe e maamaaga ke he matakupu he Tohi Tapu. Kua lagomatai foki he mena nei a koe ke manatu e tau kupu tohi mo e ke moua mafiti e tau tutūaga. He tupu ki mua e iloa mitaki haau ke he tau Tohiaga Tapu, to vagahau a koe mo e makutu mo e malolō lahi ka fakamatala ke he falu he ha magaaho he tau magaaho mo e he gahua he fonua.—1 Tesa. 1:5.
3, 4. (a) Ko e heigoa falu puhala he fakatupu ki mua e iloa mitaki ha tautolu ke he Tohi Tapu? (e) Kua fakaaoga nakai e koe e falu puhala ke iloa mitaki foki e tau Tohiaga Tapu?
3 Kia fakamahani ke veveu e Tohi Tapu haau mo e muitua ki ai he tau feleveiaaga he fakapotopotoaga. Ka taute e fakaako fakatagata mo e tauteute ma e tau feleveiaaga he fakapotopotoaga, kumi e tau kupu tohi he Tohi Tapu ne tūtū ai ti manamanatu fakahokulo ke he fakaaogaaga. Tokologa ne moua ko e totou fakahako mai e tau kupu tohi he Tohi Tapu ka e nakai mai he komopiuta po ke ha lagaki kua fakamukamuka lahi ki a lautolu ke moua ai he magaaho fakamui ka lata mo e gahua he fonua.—Ioane 14:26.
4 Falu magafaoa ne fakatoka e magaaho ke ako manatu e tau kupu Tohi Tapu. Maeke e mena nei ke taute he fakaaoga e tau laupepa ne tūtū ai e tau mataulu he tohi he taha faahi mo e kupu tohi he taha faahi. Fakafetokaki a lautolu he fakaaoga e tau laupepa nei ke kitia kua fatiaki fakahako po ke manatu nakai e lautolu e tau tutūaga. Ko e fakamahani he fakaaoga e tau fakataitaiaga he fonua mo e tali e totokoaga po ke hūhū he fakaaoga e Tohi Tapu kua fakatupu ki mua foki e lotomatala ha tautolu.
5. Ko e ha kua manako a tautolu ke fakatupu ki mua e lotomatala ha tautolu he fakaaoga e Tohi Tapu?
5 Nakai fai tohi foki kua tatai mo e Tohi Tapu. Kua haia oti i loto e tau tohiaga kua maeke ke taute e tau tagata ke ‘fakailoilo ke moua ai e moui.’ (2 Timo. 3:15) Ha kua laulahi he tau tagata he fonua kua nakai mahani mo e tau tanakiaga uho ne haia he Tohi Tapu, kua moua e tautolu e kakano mitaki ke fakatupu ki mua e lotomatala ha tautolu he fakakite ki a lautolu e mena mooli kua foaki he Tohi Tapu.—Fakatai 2:1-5.