Kumi a Lautolu kua Lata
1. Fakakite fēfē e tautolu e loto fakaaue ma e kotofaaga ke gahua he fonua?
1 He fekafekauaga ha Iesu, ne lahi e mena ne taute e ia ke hoko e tala mitaki mafanatia ki a lautolu ne matematekelea. (Isaia 61:1, 2) Ko tautolu he vahā nei ko e tau fekau mo e tau hukui ha Keriso ne moua e kotofaaga lilifu he fifitaki ki a ia he kumi fakamakamaka mo e fakamakutu ki a lautolu kua lata he fonua ha tautolu.—Mata. 10:11; 2 Kori. 5:20.
2. Kitia fēfē e puhala hikihiki ha Paulo, ti ko e heigoa e fua?
2 Kia Hikihiki: Ne mahani e aposetolo ko Paulo ke fano fakamua ke he tau sunako oti ke fakamatala ke he tau Iutaia mo lautolu kua liliuina. (Gahua 14:1) I Filipi, ne ō a ia mo Sila ke kumi e tau tagata he ‘mena kua eke ai e tau liogi.’ Ne kamata a laua ke fakamatala ke he tau fifine, ti taha ia lautolu ia ko Litia, ne talia mafiti e kupu mooli.—Gahua 16:12-15.
3. Ko e heigoa e tau puhala he gahua ka olioli e tautolu he lafi ke he fonua ha tautolu he taha fale ke he taha fale?
3 He lafi ke he fonua haau he taha fale ke he taha fale, maeke foki nakai a koe ke fakamatala ke he tau tagata ne moua he tau tuaga peleōafi, tau paaka, tau ofisa gahua, tau matahoe puhalatū ne lavelave, tau fale gahua, mo e tau fale koloa he fonua haau? Liga maeke ia koe ke fakamatala ki a lautolu he tau matakavi ne puipui lapatoa e tau gutuhala mo e tau fale ne nakai fakaatā fakahanoa, he tohitohi atu po ke hea telefoni. He matakite mo e hikihiki ke he tau tuaga kehekehe he fonua haau ka fakaatā a koe ke “fakamakai nakai noa ke he gahua he Iki.”—1 Kori. 15:58.
4. Ko e heigoa falu puhala kua moua e tautolu kaeke ke nakai lahi e fonua he fakapotopotoaga ha tautolu?
4 Tokologa e tagata fakailoa ne moua e magaaho ke fakalaulahi e fekafekauaga ha lautolu he hiki ke he taha fakapotopotoaga he motu ni ha lautolu po ke motu kehe. Ne ako he falu e vagahau foou ke fakamatala ke he tau tagata ne o mai he falu motu.
5. Kua lata ke fēfē e onoonoaga ha tautolu ke he magahala ne momoui ai a tautolu, ti ko e heigoa kua lata ke fifili a tautolu ka taute?
5 Kua lata ia tautolu oti ke tokaloto ‘ko e fonua ko e lalolagi haia.’ (Mata. 9:37; 13:38) Ha kua tata lahi e moumouaga he fakatokaaga kelea nei, igatia e tagata mo e manamanatu fakahokulo ke he haana ni a tuaga, tau taleni, tau magaaho, mo e tau puhala ke fakalaulahi e fekafekauaga haana. Kua fakamafana mai a Iehova ki a tautolu ka tuku fakamua e tautolu e tau mena he Kautu, to fakamonuina e ia e tau laliaga mooli ha tautolu ke fakalaulahi e fekafekauaga ha tautolu.—Mata. 6:33.