Kua Lata e Tau Fekafekau Kerisiano ke Liogi
1. Ko e heigoa kua lata ke maeke ke fakakatoatoa ha tautolu a gahua he fonua?
1 Nakai maeke he malolō ni ha tautolu ke fakakatoatoa e gahua he fonua. Kua foaki mai e Iehova e malolō ki a tautolu ke taute e gahua. (2 Kori. 4:7) Kua fakaaoga e ia e tau agelu haana ke lalago a tautolu he kumi a lautolu ne tuga e tau mamoe. (Fakakite. 14:6, 7) Ko Iehova ne fakatutupu e tau tega he kupu mooli kua tō mo e fakamalū e tautolu. (1 Kori. 3:6, 9) Kua aoga mooli ma e tau fekafekau Kerisiano ke falanaki ke he ha tautolu a Matua he lagi, he liogi!
2. Ko e heigoa falu mena kua lata mo e liogi?
2 Ma Tautolu: Kua lata ia tautolu ke liogi he tau magaaho oti ka fakamatala. (Efeso 6:18) Ko e heigoa falu mena kua lata mo e liogi? Maeke ia tautolu ke liogi ma e aga fiafia hagaao ke he ha tautolu a fonua mo e vagahau fakamalolo. (Gahua 4:29) Maeke ia tautolu ke ole ki a Iehova ke takitaki atu a tautolu ke he tau tagata loto hako ka fakaako mo tautolu ke he Tohi Tapu. Ka hūhū e tagata he kaina ki a tautolu, maeke ia tautolu ke liogi fakakū ke he loto he ole ki a Iehova ke lagomatai a tautolu ke tali fakatonu. (Nehe. 2:4) Liga ole foki a tautolu ma e iloilo ke tuku fakamua ha tautolu a gahua he fonua. (Iako. 1:5) Lafi ki ai, kua fiafia a Iehova ka fakaaoga e tautolu e tau kupu fakaaue ma e kotofaaga uho he eke mo tau fekafekau haana.—Kolo. 3:15.
3. Maeke fēfē he liogi ma e falu ke fakatolomaki e gahua fakamatala?
3 Ma e Falu: Kua lata foki ia tautolu ke “liogi ko e taha ma taha,” he totoku foki e tau higoa he tau matakainaga ka latatonu. (Iako. 5:16; Gahua 12:5) Fakakaupā kia he nakai malolō mitaki e tino e mena kua maeke ia koe ke taute he gahua fakamatala? Ti liogi ma e tau matakainaga ne tino malolō. Ua fakateaga ke he malolō he tau liogi haau ke lata mo e falu! Kua latatonu foki ke liogi ma e tau tui ne mua ke talia e gahua fakamatala, ke maeke he tau matakainaga ha tautolu ‘kia nonofo fakatekiteki mo e nakai fakaatukehe.’—1 Timo. 2:1, 2.
4. Ko e ha kua lata ia tautolu ke fakamakamaka ke he liogi?
4 He fakailoa e tala mitaki ke he lalolagi oti ko e matagahua makimaki. Ka “fakamakamaka ke he liogi” a tautolu, to fakakatoatoa e tautolu e gahua mo e lagomataiaga ha Iehova.—Roma 12:12.