Puhala Fe ke Fakafeilo Fakamua mo e Haau a Matakainaga?

Manamanatu kua nofo a koe i Kalilaia he magahala ha Iesu. Kua fenoga atu a koe ki Ierusalema ke fakamanatu e Galue he Tau Fale Api. Lavelave e maaga he tau tagata tapuaki ne ahiahi mai he tau matakavi mamao. Manako a koe ke taute e poa ki a Iehova. He uta mo koe e koti, ne kamata e fenoga haau he tau hala apiapi he maaga ke hoko atu ke he faituga. Mogo ne hoko atu a koe, kua puke e faituga he falu tagata ne manako foki ke foaki e poa. Hoko mai tuai e magaaho ke age e koti haau ke he tau ekepoa. He magaaho tonu ia, ne manatu e koe e matakainaga haau ne liga haia foki he taha matakavi he maaga ne kua mamahi ai ki a koe. Fakamaama e Iesu e mena kua lata a koe ke taute. (Totou Mataio 5:24.) Maeke fēfē a koe mo e matakainaga haau ke fakafeilo tuga ne hataki e Iesu? He tau vala i lalo, tuku e fakamailoga he hihika e tali hako.

LATA A KOE . . .

• ke tutala ni mo e matakainaga haau ka manatu a koe kua fai kakano mooli ne ita a ia

• ke lali ke fakahako e manamanatuaga he matakainaga haau ka logona hifo e koe kua uliulitonu lahi po ke fai vala foki ke he lekua

• ke fanogonogo fakatekiteki he talahau he matakainaga haau e tau logonaaga haana, ti pete kua nakai maama katoatoa e koe, fakamolemole mooli age ha ko e mamahi ne logona hifo e ia po ke tau fua he mena ne nakai taute pauaki e koe

LATA E MATAKAINAGA HAAU . . .

• ke kumi e lalagoaga he falu he fakapotopotoaga he tala age ki a lautolu kua ekefakakelea e koe a ia

• ke tauage a koe, liu talahau oti e tau hepehepe, ti manako ki a koe ke talahau e hepe haau

• ke mailoga e loto fakatokolalo mo e loto malolō haau ke tutala ki a ia, ti fakamagalo fakamakai mai he loto

Pete kua nakai putoia e tau poa manu he tapuakiaga ha tautolu mogonei, ko e heigoa ne fakaako e Iesu ke he matutakiaga he fakafeilo mo e matakainaga ha tautolu mo e tapuakiaga kua talia ke he Atua?