Fua Mai Ni Ha Ko e Mamali!

TOKOUA e fifine fuata ne ō hui he matakavi pisinisi ha Baguio City i Filipaina. Kitia e laua e peleō tohi ka e nakai ō a laua ki ai. Ko Helen ko e matakainaga fifine ne mamali lahi ki a laua he tū he tapa he peleō fakamatala. Matutaki ni e tau fifine ke ō, ka e nava a laua ke he mamali mafanatia ha Helen.

Fakamui, he ō e tau fifine ki kaina he pasi ne kitia e laua e fakamailoga lahi he jw.org he Fale he Kautu. Manatu e laua ko e tau matatohi ia ni kua kitia he peleō tohi. Ne hohopo a laua he pasi mo e fakakia e setulu he tau feleveiaaga ma e tau fakapotopotoaga kehekehe ne tū he Fale he Kautu.

O atu e tau fifine tokoua nei ke he taha he tau feleveiaaga ia. Ko hai ne kitia e laua he huhū atu ke he Fale he Kautu? Ko Helen! Ne mafiti a laua ke mailoga ko ia e fifine ne mamali lahi. “He o mai a laua ki a au,” ui e Helen, “ne tupetupe au. Manatu au kua liga fai mena hepe au ne taute.” Ka e fakamaama age he tau fifine ki a Helen e mena ne tupu.

Fiafia e tau fifine fuata nei ke he feleveiaaga mo e mafanatia he fakalataha mo e tau matakainaga. He kitia e laua e falu ne fakameā e Fale he Kautu he oti e feleveiaaga, ne ole a laua ke lagomatai. Taha he tau fifine kua toka e motu, ka ko e taha kua fina atu ke he tau feleveiaaga mo e kamata ke fakaako e Tohi Tapu​—fua mai ni ha ko e mamali!