Tālaga e Solomona e Faituga

ATO mate a Tavita, ne age e ia ki a Solomona e tau fakatokatokaaga mai he Atua ke tālaga aki e faituga ha Iehova. He tau ke fāaki he haana pule, ne kamata a Solomona ke talaga e faituga, ti fitu mo e hafa e tau ti mau ai. Ne totou hogofulu afe e tau tagata taane ne gahua he faituga, mo e loga lahi mahaki e tau tupe ke tālaga aki ai. Pihia ai ha kua lahi mahaki e auro mo e ario ne fakaaoga i ai.

Ne ua e poko lalahi he faituga, tuga ni e fale utafano. Ka ko e tau poko nei ne fakalahiua ke he tau poko foki he fale utafano. Ne tuku e Solomona e puha he maveheaga i loto he poko he uho he faituga.

Magaaho ne mau e faituga, ne taute ai e fakafiafiaaga lahi. Ne fakatokotui a Solomona i mua he faituga mo e liogi, tuga ne kitia e koe he fakatino. ‘Nakai maeke e lagi katoa ke hao ai a koe,’ he talahau e Solomona ki a Iehova, ‘ti mua atu e tote he faituga nei ke hao ai a koe. Haaku Atua na e, fakamolemole fanogonogo mai ke he tau tagata haau ka liogi atu a lautolu ke he matakavi nei.’

Magaaho ne oti e liogi ha Solomona, ne to hifo e afi mai he lagi. Ne fakaotioti ai e tau poa manu ne taute. Ti puke ai e faituga ke he kikila he maama mai ia Iehova. Kua fakakite he mena nei ko Iehova ne fanogonogo, ti kua fiafia a ia ke he faituga mo e liogi ha Solomona. Ko e faituga, nakai ko e fale utafano, kua eke mogonei mo matakavi ke ō atu e tau tagata ke tapuaki ai.

Ne leva e pule a Solomona ke he puhala iloilo, ti fiafia e tau tagata. Ka e faihoana a Solomona ke he tau fifine tokologa mai he falu motu ne nakai tapuaki ki a Iehova. Kitia nakai e koe e taha ia lautolu ne tapuaki ke he tupua ta? Fakahiku ai ne fakaohooho he tau hoana ha Solomona a ia ke tapuaki ke he falu atua foki. Iloa nakai e koe e mena ne tupu he mogo ne taute pihia e Solomona? Ne nakai pule totonu a ia ke he tau tagata. Ne aga vale a ia, ti nakai fiafia e tau tagata.

Ne ita a Iehova ki a Solomona ha ko e mena nei, ti tala age a ia: ‘To utakehe e au e kautu ia koe mo e ta age ai ke he taha tagata. To nakai taute ai e au he magaaho he haau a moui, ka to taute e au ka pule e tama haau. Ka e nakai utakehe e au e tau tagata oti mai he kautu he tama haau.’ O mai la ke kitia ko e tupu fēfē e mena nei.