Iesepela—Ko e Patuiki Fifine Kelea

HE MOLE e mate he Patuiki ko Ierepoamo, ko e tau patuiki ne pule ke he kautu he magafaoa toko 10 he faahi tokelau ha Isaraela, ne kelea oti. Ko e Patuiki ko Ahapo ne mua atu e kelea ke he tau patuiki oti. Iloa nakai e koe ko e ha? Taha kakano lahi ha ko e hoana haana, ko e patuiki fifine kelea ko Iesepela.

Nakai ko e fifine Isaraela a Iesepela. Ko ia ko e tama fifine he patuiki a Saitonu. Ne tapuaki a ia ke he atua fakavai ko Paala, ti fakaohooho e ia a Ahapo mo e tokologa he tau Isaraela ke tapuaki foki ki a Paala. Ne vihiatia lahi e Iesepela a Iehova ti tokologa haana tau perofeta ne kelipopo e ia. Ne fakamumuli falu he tau ana neke kelipopo a lautolu. Ka manako a Iesepela ke he taha mena, to hokotia a ia ke kelipopo e tagata ke moua ai.

Taha e aho ne momoko lahi e Patuiki ko Ahapo. Ti hūhū a Iesepela ki a ia: ‘Ko e ha a koe ne momoko ai he aho nei?’

‘Ha ko e mena ne talahau e Napota ki a au,’ he tali e Ahapo. ‘Ne manako au ke fakatau e ulu vine haana. Ka e pehē a ia to ai maeke ia au ke moua.’

‘Ua tupetupe,’ he ui e Iesepela. ‘To moua e au ke atu ki a koe.’

Ati tohitohi ai a Iesepela ke he falu he tau takitaki he maaga ne nofo ai e tagata nei ko Napota. ‘Tamai falu tagata nakai fai aoga ke hokotaki kua kupu kelea a Napota ke he Atua mo e patuiki,’ he tala age e ia ki a lautolu. ‘Ti takitaki atu a Napota ki tua he maaga mo e pinimaka a ia ke mate.’

Ko e magaaho ne iloa ai e Iesepela kua mate a Napota, ne pehē a ia ki a Ahapo: ‘Kia matike ā mo e uta e uluvine maau.’ Talia nakai e koe kua lata a Iesepela ke fakahala ha kua taute e mena kelea lahi ia?

Ne hoko mai e magaaho, ti fakafano atu e Iehova a Iehu ke fakahala a ia. Magaaho ne logona e Iesepela kua hau a Iehu, ne vali e ia haana tau mata mo e tauteute ke fulufuluola. Ka ko e magaaho ne hau a Iehu ti kitia a Iesepela he fakamaama, ne ui atu a ia ke he tau tagata taane he fale he patuiki: ‘Kia liti hifo a ia!’ Ne omaoma e tau tagata, tuga ne kitia e koe he fakatino. Ne liti hifo e lautolu a ia, ti mate a ia. Ko e fakaotiaga hanei he patuiki fifine kelea ko Iesepela.