Toka he Tau Tagata he Atua a Papelonia

KUA teitei ua e tau he mole e fofō he tau Metai mo e tau Peresia a Papelonia. Ti onoono la ke he mena kua tupu mogonei! E, kua toka he tau Isaraela a Papelonia. Fakatokanoa fēfē a lautolu? Ko hai ne fakatoka a lautolu ke ō?

Ko Kuresa ko e patuiki ha Peresia ne taute e mena ia. Fakamua atu ato fanau a Kuresa, ne omoomoi e Iehova e perofeta haana ko Isaia ke tohi hagaao ki a ia: ‘To taute e koe e tau mena oti kua loto au ke taute e koe. To hafagi e tau gutuhala ma haau ke fofō e maaga.’ Mo e ko Kuresa ka takitaki e fofōaga ha Papelonia. Ne hohoko e tau Metai mo e tau Peresia ki loto he maaga he pouli he pō, ha kua tokanoa e tau gutuhala.

Ka kua pehē foki a Isaia ko e perofeta ha Iehova, ko Kuresa ka poaki ke liu talaga a Ierusalema mo e faituga i ai. Talahau nakai e Kuresa e poakiaga nei? E, talahau e ia. Hanei e mena ne tala age e Kuresa ke he tau Isaraela: ‘Kia o atu a ki Ierusalema mo e talaga e faituga ha Iehova ko e Atua ha mutolu.’ Ti kua fenoga atu e tau Isaraela nei ke taute e mena ia.

Ka kua nakai maeke e tau Isaraela oti i Papelonia ke liliu atu he fenoga loa ki Ierusalema. Ko e fenoga loa lahi mahaki ne kavi ke he 500 e maila (800 e kilomita) ti tokologa ne fuakau lahi mo e gagao lahi ke ō he fenoga mamao. Kua loga foki e tau kakano ati nakai o atu e falu. Ka e tala age a Kuresa ki a lautolu ne nakai ō: ‘Kia foaki e ario mo e auro mo e falu mena fakaalofa ke he tau tagata kua liliu atu ke talaga a Ierusalema mo e faituga i ai.’

Ti loga e mena fakaalofa ne age ke he tau Isaraela nei kua o atu ki Ierusalema. Ne age foki e Kuresa ki a lautolu e tau polu mo e tau kapiniu ne tamai he Patuiki ko Nepukanesa he faituga ha Iehova he mogo ne moumou a Ierusalema. Ne loga e tau mena he tau tagata ke uta mo lautolu he liliu.

He mole e kavi ke he fā e mahina he fenoga atu ai, ne hohoko e tau Isaraela he magaaho tonu ki Ierusalema. Ne kua 70 e tau tali mai he moumou e maaga, ti tokanoa katoatoa e motu nakai fai tagata. Ka e pete kua liliu mai e tau Isaraela mogonei ke he motu ha lautolu to feleveia a lautolu mo e tau magaaho uka, to fakaako a tautolu ki ai he vala i mua.