Mo e Fifine he Vaikeli

KO IESU ne nofo ke okioki he tapa vaikeli i Samaria. Kua o atu e tau tutaki haana ke he maaga ke fakatau mena kai. Ko e fifine ne fa e tutala a Iesu ki ai kua hau ke ahu vai. Ne pehē a ia ke he fifine: ‘Mai taha mena ke inu au.’

Ne ofo lahi e fifine he mena nei. Iloa nakai e koe e kakano? Ha ko e tagata Iutaia a Iesu, ka ko e fifine Samaria a ia. Ti tokologa e tau Iutaia ne ai fiafia ke he tau Samaria. Nakai fia tutala a lautolu ki ai! Ka kua fakaalofa a Iesu ke he tau tagata oti kana. Ti pehē a ia: ‘Kaeke ke iloa e koe a ia kua ole mena inu ki a koe, to ole a koe ki a ia mo e to atu e ia ki a koe e vai he moui.’

‘Ko e Iki na e,’ he ui he fifine, ‘na hokulo e vaikeli, ti nakai fai pakete a koe. To tamai e koe i fe e vai nei he moui?’

‘Kaeke ke inu mai a koe he vaikeli nei to liu a koe ke fia inu,’ he fakamaama e Iesu. ‘Ka ko e vai ka age e au to maeke e tagata ke moui tukulagi.’

‘Ma Iki na e,’ he ui he fifine, ‘mai e vai ia ki a au! To nakai liu au ke fia inu. Ti nakai lata ke liu mai foki ke ahu vai.’

Kua manatu e fifine ko e tutala a Iesu ke he vala vai. Ka kua tutala a Iesu hagaao ke he kupu mooli he Atua mo e haana kautu. Ko e kupu mooli nei kua tuga e vai he moui. Kua maeke ke foaki ke he tagata e moui tukulagi.

Ne tala age a Iesu mogonei ke he fifine: ‘Fano a mo e ui ke he taane haau ti liu mai.’

‘Nakai fai taane au,’ he tali he fifine.

‘Kua tonu e tali haau,’ he talahau e Iesu. ‘Ha kua tokolima e taane haau, ti ko e tagata taane ne nofo mo koe mogonei kua nakai ko e taane haau a ia.’

Ne ofomate e fifine ha kua hako e tau mena oti nei. Iloa fēfē e Iesu e tau mena nei? E, ha ko Iesu ko Ia ne Mavehe, ne fakafano mai he Atua ti age he Atua e tau vala tala nei ki a ia. Ka ko e mogonei kua liliu mai e tau tutaki ha Iesu, ti ofo a lautolu ha kua tutala a ia ke he fifine Samaria.

Ko e heigoa ha tautolu kua ako mai he tau mena oti nei? Fakakite ai kua totonu a Iesu ke he tau tagata he tau lanu kehekehe oti. Ti kua lata a tautolu ke pihia foki. Nakai lata ia tautolu ke manamanatu ko e tau tagata kelea e falu tagata ha ko e lanu ni ha lautolu. Manako a Iesu ke iloa he tau tagata oti e kupu mooli ka takitaki atu ke he moui tukulagi. Ti kua lata foki ia tautolu ke manako ke lagomatai e tau tagata ke iloa e kupu mooli.