Ko Timoteo—Ko e Lagomatai Foou ha Paulo

KO E fuata taane ne kitia e koe hinei mo e aposetolo ko Paulo, ko Timoteo a ia. Ne nofo a Timoteo mo e magafaoa haana i Luseta. Ko e higoa he matua fifine haana ko Eunike mo e tupuna fifine haana ko Loi.

Ko e ahiahi ke lagatolu aki anei ha Paulo ki Luseta. Kavi ke he taha e tau kua mole, ne o mai fakamua laia a Paulo mo Panapa ki hinei he fenoga fakamatala. Ti kua liu atu a Paulo mogonei mo e kapitiga haana ko Sila.

Iloa nakai e koe ko e heigoa ha Paulo fa e tutala ki a Timoteo? ‘Manako nakai a koe ke fakalataha mai mo Sila mo au?’ he hūhū e ia. ‘Maeke ia maua ke fakaaoga haau a lagomatai he fakamatala ke he tau tagata he tau matakavi mamao.’

‘E,’ he tali e Timoteo, ‘manako au.’ He nakai leva ne toka e Timoteo e magafaoa haana ti fano mo Paulo mo Sila. Ka e ato fakaako a tautolu ke he fenoga ha lautolu, o mai la ke kumikumi ke he mena ne kua tupu ki a Paulo. Kua kavi ke he 17 e tau tali mai he tū atu a Iesu ki a ia he puhalatū i Tamaseko.

Manatu, na hau a Paulo ki Tamaseko ke fakamamahi e tau tutaki ha Iesu, ka ko e mogonei kua eke foki a ia mo taha tutaki! He mogo fakamui ne pulega e falu he tau fī ke tamate a Paulo ha kua nakai fiafia a lautolu ke he fakaakoaga haana hagaao ki a Iesu. Ka kua lagomatai he tau tutaki a Paulo ke hola. Ne tuku e lautolu a ia he kato ti tuku hifo ki tua he kaupā he maaga.

He mogo fakamui ne fano a Paulo ki Anetioka ke fakamatala. He matakavi nei ne fakahigoa fakamua ai e tau tutaki ha Iesu ko e tau Kerisiano. Ti kua fakafano atu a Paulo mo Panapa mai i Anetioka he fenoga fakamatala ke he tau motu mamao. Taha he tau maaga ne ahiahi e lautolu ko Luseta, ko e kaina ha Timoteo.

He mogonei, kavi ke he taha e tau he mole, ne kua liu atu a Paulo ki Luseta he fenoga ke uaaki. Magaaho ne ō a Timoteo mo Paulo mo Sila, iloa nakai e koe ko e ō a lautolu ki fe? Onoono ke he mepe, ti o mai ke fakaako ke he falu he tau matakavi.

Fakamua, ne ō a lautolu ki Ikonio, ti ke he maaga ke uaaki ne higoa ko Anetioka. Ka mole ia, ne o hake a lautolu ki Tiroa, ti ō ki Filipi, Tesalonia mo Perea. Kitia nakai e koe a Atenai he mepe? Ne fakamatala a Paulo i ai. Ka mole ia, ne taha mo e hafa e tau ha lautolu he fakamatala i Korinito. Fakahiku ai, ne tutū fakakū a lautolu i Efeso. Ti liliu mai a lautolu he toga ki Kaisaria, ti o hake ki Anetioka, ne nofo hifo a Paulo i ai.

Ne totou teau e tau maila he fano ai a Timoteo ke lagomatai a Paulo ke fakamatala e “tala mitaki” mo e ke kamata e loga he tau fakapotopotoaga Kerisiano. Ka lahi a koe, to eke nakai a koe mo fekafekau tua fakamooli he Atua tuga a Timoteo?