Veveheaga 20

Mana ke Uaaki i Kana

KO E magaaho ne liu a Iesu ke he hana maaga he mole e gahua fakamatala lahi i Iutaia, nakai ni ke okioki. Ka kua kamata e ia e feua lahi atu i Kalilaia, ko e maaga ne tupu hake a ia. Ka ko e hana a tau tutaki, kua lata ke nonofo mo ia, ka kua liliu ni ki kaina ke he ha lautolu a tau magafaoa mo e ha lautolu a tau gahua fakamua.

Ko e heigoa e fekau ne kamata fakamatala e Iesu? Ko e hanai: “Kua tata mai tuai e kautu he Atua; ati tokihala a, mo e talia e vagahau mitaki.” Ko e heigoa e tali? Ne talitonu e tau Kalilaia ki a Iesu. Ne fakalilifu oti ki a ia. Ka e taha e mena, nakai ni ha ko e hana a fekau, ka ko e tokologa ia lautolu ne ha ha i ai he Paseka i Ierusalema he tau mahina fakamua ne kitia e tau fakamailoga ofoofogia ne taute e ia.

Ne kamata e Iesu hana a feua lahi i Kalilaia i Kana. Ke he magaaho fakamua, manatu e koe, he liliu mai i Iutaia, ne fakafaliu uaina e ia e vai he galue he fakamauaga i ai. Ke he magaaho nei ke uaaki, ko e tama he taha iki gahua fakatufono he Patuiki ko Herota Anetipa ne gagao lahi. Ne logona ai kua hau a Iesu i Iutaia ki Kana, ne tuku fenoga e iki nei mai he maaga hana ko Kapanaumi ke kumi ia Iesu. Ha kua lahi e momoko, ti omoomoi he tagata nei: ‘Fakamolemole, hau fakaave, to mate haku tama.’

Ne tali e Iesu: ‘Liu ki kaina. Kua malolo tuai hau a tama!’ Ne talitonu e fekafekau ha Herota mo e kamata ke fenoga he hala mamao ki kaina. Ke he magahehala ne feleveia a ia mo lautolu hana tau fekafekau, ne fakamafiti ke talahau ki a ia kua mitaki e tau mena oti​—kua malolo hana a tama! ‘Malolo he magaaho fe a ia?’ he huhu e ia.

‘I ne afi he matahola taha,’ he tali e lautolu.

Ne mailoga he iki fekafekau, ko e magaaho tonu ia ni ne pehe a Iesu, ‘Kua malolo tuai hau a tama!’ He mole atu e mena ia, ko e tagata nai mo e hana a magafaoa katoa ne eke mo tau tutaki ha Keriso.

Ko e mena ia ne talahaua ai a Kana mo fakamailoga liu mai i Iutaia, ko e lagaua ia ne taute e Iesu e tau mana. Nakai ko e tau mana ni a nei ne taute e ia ke hoko ke he magaaho tonu nei, ka ko e mahuiga a laua ha kua fakamailoga aki hana a liu atu ki Kalilaia.

Ne fano a Iesu mogonei ki kaina i Nasareta. Ko e heigoa ne fakatali mai ki a ia i ai? Ioane 4:​43-54; Mareko 1:​14, 15; Luka 4:​14, 15.

▪ Ko e magaaho ne liu a Iesu ki Kalilaia, ko e heigoa ne tupu ke he hana tau tutaki, mo e talia fefe he tau tagata a ia?

▪ Ko e heigoa e mana ne taute e Iesu, mo e lauia fefe a lautolu ne putoia ai?

▪ Mahuiga fefe a Kana ki a Iesu?