Veveheaga 31

Faki Saito he Sapati

NE NAKAI leva ti toka e Iesu mo e tau tutaki hana a Ierusalema ke liliu ki Kalilaia. Ko e vaha tau tupu, ha ha i ai ke he ulu saito e tau fua saito. Ne hoge e tau tutaki. Ti ko e mena haia ne faki e lautolu e tau fua saito mo e kai ai. Ka ko e Sapati, ti nakai to noa ha lautolu a tau gahua nakai kitia e taha.

Ko e tau takitaki lotu i Ierusalema ne kumi ke kelipopo a Iesu he tuaha kua moumou e Sapati. Ne tukumale he tau Farasaio. “Kua eke he tau tutaki hau e mena kua nakai lata he eke ke he sapati,” he hokotaki e lautolu.

Ko e talahauaga he tau Farasaio ko e faki saito mo e mili ke he tau lima ke kai ko e helehele mo e haha ke fakamea a ia. Ka ko e ha lautolu a fakamaama kaka ke he kakano mo e ko e heigoa e gahua ne fakamamafa e Sapati, ka ko e mena kua lata ke fiafia mo e magaaho ke ati hake fakaagaga. Ko e mena haia ne liu a Iesu fakaako aki e tau fakafifitakiaga mai he Tohiaga Tapu ke fakakite ne nakai finagalo a Iehova ko e Atua ke fakakakano kaka pihia Hana a fakatufono ke he Sapati.

Ne pehe a Iesu ko e magaaho ne hoge ai a Tavita mo e hana tau tagata, ne o a lautolu ke he faituga mo e kai e tau falaoa he poa. Ko e tau falaoa ia kua fita he utakehe mai mua a Iehova ka e tuku ai e tau falaoa fou, mo e ko e tau falaoa toka pauaki ke kai e tau ekepoa. Ka e taha e mena, ha ko e tau mena ne tutupu, ko Tavita mo e hana tau tagata ne nakai hala he kai e lautolu.

Ne fakaaoga foki taha fakafifitakiaga, ne pehe a Iesu: “Ka e nakai kia totou foki e mutolu ke he Fakatufono, ko e tau sapati oti kua holi ai e sapati he tau ekepoa ke he faituga, ka e nakai hala a lautolu?” E, pete ni ko e Sapati ne keli he tau ekepoa e tau manu mo e falu a gahua foki he faituga ha ko e taute he tau poa manu! “Ka e tala atu e au kia mutolu,” he talahau e Iesu, “Ha hinai taha kua mua ke he faituga.”

He akonaki ke he tau Farasaio, kua matutaki a Iesu: “Ane mai kua iloa e mutolu e kakano he kupu nai, Mena loto au ke he fakaalofa, ka e nakai ko e poa, po kua nakai fakahala e mutolu a lautolu nakai hala.” Ne fakaoti e ia: “Ha ko e Tama he tagata ko e Iki foki haia he sapati.” Ko e heigoa e kakano he talahauaga ia ha Iesu? Ko e tala a Iesu ke he pule mafola he Kautu he afe tau.

Ke he 6,000 tau he magaaho nei, ne matematekelea e tau tagata he fekafekau mamafa i lalo ha Satani ko e Tiapolo, mo e vale mo e felakutaki he tau aho oti. Ka ko e taha fahi, ko e Sapati lahi he pule ha Keriso ko e magaaho okioki mai he tau mamahi oti mo e tau pehiaaga pihia. Mataio 12:​1-8; Levitika 24:​5-9; 1 Samuela 21:​1-6; Numera 28:9; Hosea 6:6.

▪ Ko e heigoa e hokotaki ke he tau tutaki ha Iesu, mo e tali fefe e Iesu?

▪ Ko e heigoa e kaumahalaaga he tau Farasaio ne fakakite e Iesu?

▪ Ko e puhala fe ne eke a Iesu mo “Iki . . . he sapati”?