Veveheaga 40

Ko e Fakaakoaga he Fakaalofa Noa

LIGA ko Iesu agaia ni i Naina, ko e matakavi ne fakaliu tu mai laia e ia e tama tane he takape, po ke ahiahi atu a ia ke he taha maaga tata mai. Ko e Farasaio ne higoa ko Simona ne manako ke kitia tata a ia ne taute e tau gahua ofoofogia pihia. Ko e mena ia ne uiina e ia a Iesu ke kai fakalataha mo ia.

Ko e onoonoaga ke fakamatala ki a lautolu ka ha ha i ai, ati talia e Iesu e uiina, pihia ni e taliaaga hana ke he tau uiina ke kai mo lautolu e tau tagata oko tukuhau mo e tau tagata hala. Ka e taha e mena, magaaho ne hu atu a ia ke he fale ha Simona, ne nakai taute e ia ki a Iesu e fakafeleveiaaga ne aga mau ke taute aki a lautolu ne uiina.

Ko e tau hui ne vela mo e kiva he tui senetolo ha ko e tau puhala tu efu ne o ai, ti ko e aga mahani mau he fakafeleveiaaga ke holoholo e tau hui he tagata ne uiina aki e vai momoko. Ka e nakai holoholo e tau hui a Iesu he magaaho ne hoko atu a ia. Ne nakai figita foki ki a ia, ko e aga mahani mau. Ne nakai fakafeleveia foki aki e lolo ke he hana a ulu ke lata mo e aga mahani mau.

Ko e taha magaaho he kaiaga, ne nonofo hifo a lautolu ne uiina he laulau, ne hu mai fakaeneene e fifine ne nakai uiina ke he poko. Ne talahaua a ia ke he maaga ko e fifine moui agahala. Liga logona e ia e tau fakaakoaga ha Iesu, fakalataha mo e uiina hana ki a lautolu ne ‘matematekelea ke o mai kia ia ke moua e okiokiaga.’ Ne aamohia lahi a ia ha ko e tau mena ne kitia mo e logona, ko e mena haia ne kumi atu a ia ki a Iesu.

Ne hau e fifine i tua ha Iesu he laulau mo e fakatokotui e tau matatuli ke he hana tau hui. Ko e magaaho ne hihina hifo hana tau hihina mata ke he hana tau ve, ti holoholo aki hana tau lauulu. Ne tamai foki e ia e lolo manogi he hana lupo, mo e magaaho taha ia ni ne figita fakaeneene e ia hana tau ve, ne liligi aki e ia e lolo manogi hana tau hui. Ne onoono a Simona mo e vihiatia. “Kane mai ko e perofeta a enei,” he manamanatu e ia, “po kua iloa e ia e fifine nai, mo e hana mahani, kua piki atu a ia kia ia; ha ko e fifine hala a ia.”

Ne fioia e ia hana manamanatuaga, ne pehe a Iesu: “Ma Simona na e, ko e haku a kupu ke tala atu e au kia koe.”

“Ko e akoako na e, tala mai a,” he talahau e ia.

“Ko e tokoua e tagata ne ogo tupe mai a laua he taha tagata; ne ogo taha lima geau e tenari, ka e limagofulu he taha. Ti kua nakai fai tupe a laua ke liuaki, ti fakamagalo noa atu ai a ia kia laua tokoua. Tala mai a koe, po ko hai taha ia laua ne lahi hana fakaalofa kia ia?”

“Na ko ia ni,” he talahau e Simona, tuga e fakateaga he nakai fai matutakiaga e huhu, “ne fakamagalo atu ki ai e tau mena loga.”

“Ko e moli a koe,” he talahau e Iesu. Mo e fuluhi atu ke he fifine, ne pehe atu ki a Simona: “Kua kitia nakai e koe e fifine nai? na hu mai au ke he hau a fale, ti nakai ta mai e koe ha magavai mo e na hui haku; ka ko ia ni, kua fakahihina hifo e ia e tau hihina mata mo e na hui haku, mo e holoholo aki ke he hana ni a lauulu. Nakai fakafigita mai e koe au; ka ko ia ni, kua nakai oki he figita a ia ke he haku tau hui tali mai he hu mai au. Nakai fakauku mai e koe hoku ulu ke he magalolo noa; ka ko ia ni, kua fakatākai e ia haku a tau hui ke he magalolo manogi.”

Kua fakakite he fifine e tokihala moli mai he hana loto ma e tau agahala hana kua mole. Ne fakahiku e Iesu, he talahau: “Ko e mena ia ke tala atu ai e au kia koe, kua fakamagalo tuai hana tau hala loga, ha ko e mena kua fakaalofa lahi mai a ia; ka ko ia kua fakamagalo ki ai taha mena tote, kua tote foki hana fakaalofa mai.”

Ne nakai toka noa po ke tiaki noa e Iesu e mahani kelea. Ka ko e mena nei, kua fakakite a fakaalofa hofihofi mo e maama e ia e tau tagata ne taute e tau hepehepe he moui ka e fakakite e lautolu e tokihala ke he tau mena ia mo e o mai ki a Iesu ke moua e okiokiaga. Ne foaki age e okioki moli ke he fifine, ne pehe a Iesu: “Kua fakamagalo tuai hau a tau hala. . . . Kua moui tuai a koe ke he hau a tua; ati fano a mo e monuina.” Luka 7:​36-50; Mataio 11:​28-30.

▪ Fakafeleveia fefe he tagata he kaina ko Simona a Iesu?

▪ Ko hai ne kumi atu ki a Iesu, mo e ko e ha?

▪ Ko e heigoa e fakatai ne foaki e Iesu, mo e fakaaoga fefe e ia?