Veveheaga 76

Kai mo e Farasaio

KUA mole he tali e Iesu e tau tagata fakafili hana he huhu e punaaga he hana malolo ke fakamaulu e tagata ne nakai maeke ke vagahau, ne uiina he Farasaio a ia ke kai. Ato kai a laua, ne holoholo e tau lima he Farasaio ke he aga mo e mahani ke hoko hake ke he tau tuli lima. Ne taute pihia e lautolu fakamua mo e ka oti e kai mo e vahaloto foki he tau veveheaga kai. Pete ni he nakai moumou he mahani mo e aga toka tuai e fakatufono tohi he Atua, ka e molea e mena ne manako e Atua ke he fakamanatuaga he mahani mea.

Ko e magaaho ne nakai muitua e Iesu e aga mo e mahani toka tuai ne ofo lahi e tagata he kaina ne uiina a ia. Pete ni he nakai vagahau ke he tau kupu hana a ofomate, ne mailoga e Iesu mo e pehe: “Ko mutolu e tau Farasaio, kua fakamea e mutolu e tua he kapiniu mo e kumete; ka ko loto ia mutolu kua puke namo ke he fofo mena mo e mahani kelea. Ko e tau tagata goagoa na e! ko ia ne eke e tua, ka e nakai kia eke foki e ia e liu.”

Ne fakakite e Iesu e pikopiko he tau Farasaio ne holoholo tumau ha lautolu a tau lima ha ko e aga mo e mahani ka e kaumahala ke fakamea ha lautolu a tau loto mai he tau mahani kelea. Ne fakatonu e ia: “Ka kia uta e mutolu e tau mena ha i loto mo mena fakaalofa noa; kitiala, ti mea ai e tau mena oti kia mutolu.” Kua lata e tau mena foaki ha lautolu ke fakalagalaga mai he loto fakaalofa, nakai ha ko e manako ke fakafiafia e falu ha ko e ha lautolu a tututonu fakavai.

“Oi fakaalofa kia mutolu e tau Farasaio!” he matutaki e Iesu, “ha kua ta atu e mutolu e mena ne hogofulu aki e mili mo e pekano, mo e tau lakau oti he mateafu; ka e tiaki e mutolu e fakafiliaga mo e fakaalofa ke he Atua; kua lata ni kane mai eke e mutolu e tau mena ia, ti ua tiaki foki e tau mena na.” Ko e fakatufono he Atua ke he fanau Isaraela kua lata ke totogi e mena ke hogofuluaki, po ke taha mai he hogofulu e tau fua he fonua. Ko e mili mo e pekano ko e tau akau ikiiki po ke tau mena fakamanogi kai. Ne fakamakutu e tau Farasaio ke totogi a tau mena ke hogofuluaki he tau akau fakateaga nei, ka e akonaki e Iesu a lautolu he tiaki e tau mena ne mua he aoga ko e fakakite he fakaalofa, fakagahuahua e mahani totonu, mo e mahani fakalatalata.

Ne akonaki foki ki a lautolu, ne pehe a Iesu: “Oi fakaalofa kia mutolu e tau Farasaio! ha ko e mena fiafia a mutolu ke he tau nofoaga uho he tau sunako, kia fakaalofa foki a mutolu ke he tau male. Oi fakalofa kia mutolu e tau tohikupu mo e tau Farasaio, ko e tau tagata pikopiko! nukua lata a mutolu mo e tau tukuaga galo; kua evaeva foki e tau tagata ki luga ha lautolu, ka e nakai kitia.” Ne nakai kitia mahino ha lautolu a mahani nakai mea. Ko e lotu he tau Farasaio ko e fakatata noa i fafo ka e nakai fai kakano a loto! Ne fakave aki ni e pikopiko.

Ha kua fanogonogo ke he tau akonakiaga ia, ko e loea, ko e taha mai ia lautolu ne iloa lahi e Fakatufono he Atua, ne fai talahauaga: “Ko e akoako na e, kua fakakelea mai e koe a mautolu he hāu a tau kupu na.”

Ne putoia ai foki e tau ako Fakatufono nei he pehe a Iesu: “Oi fakaalofa foki kia mutolu e tau ako Fakatufono! ha kua tuku atu e mutolu e tau kavega mamafa ke he tau tagata, ka ko mutolu nakai fakai ke piki atu ke he tau kavega ia mo e taha matalima ha mutolu. Oi fakaalofa kia mutolu! ha kua ati e mutolu e tau tukuaga he tau perofeta; ka ko e tau matua ha mutolu ne kelipopo e lautolu a lautolu.”

Ko e tau kavega ne talahau e Iesu ko e tau tala tuai, ka ko e tau loea nei ne nakai lagaki ha fakatufono tote ke fakamukamuka aki e tau tagata. Ne fakakite e Iesu kua talia foki e lautolu e kelipopo he tau perofeta, mo e poaki e ia: “Kia kumi ai ke he hau nai e toto he tau perofeta oti, ne fakamaligi tali mai he fakave he lalolagi; ke kamata mai he toto ha Apelu, ati hoko atu ke he toto a Sakaria, ne mate he vaha he fatapoa mo e faituga; ko e moli, ke tala atu e au kia mutolu, to kumi ni ke he hau nai.”

Ko e lalolagi he tau tagata ke fakafeilo ne kamata mai he fanauaga he tau fanau ha Atamu mo Eva; ti ko e mena ia, ne moui a Apelu he “fakave he lalolagi.” Mui mai he kelipopo kelea ha Sakaria, ne moumou he malolo Suria a Iuta. Ka e talahau tuai e Iesu e moumouaga ne mua atu e kelea ke he hana a hau ha ko e lahi mahaki e mahani kelea. Ne fakahoko e moumouaga nei he liga ke he 38 e tau tau he magaaho fakamui, he 70 V.N.

Ne matutaki hana a akonaki, ti pehe a Iesu: “Oi fakaalofa kia mutolu e tau ako Fakatufono! ha kua uta e mutolu e kei he maama; nakai huhu atu ai a mutolu, kua hataki foki e mutolu a lautolu ha ne huhu atu.” Ko e tau ako Fakatufono, ko e matagahua pauaki ha lautolu ke fakamaama e Kupu he Atua ke he tau tagata, ke vevete mai hana kakano. Ka e kaumahala a lautolu ke taute e mena nei mo e utakehe foki e lautolu mai he tau tagata e tau magaaho ke maeke ke maama.

Ko e tau Farasaio mo e tau ako fakatufono pulotu kua ita lahi ki a Iesu he fakatapakupaku a lautolu. Ko e magaaho ne toka e ia e fale, ne kamata a lautolu ke totoko mo e vale lahi mo e viko takai a ia aki e tau huhu. Ne lali a lautolu ke hele a ia ke vagahau taha mena ke maeke ia lautolu ke tapaki a ia. Luka 11:37-54; Teutaronome 14:22; Mika 6:8; 2 Nofoaga he Tau Patuiki 24:​20-25.

▪ Ko e ha ne akonaki e Iesu e tau Farasaio mo e tau ako Fakatufono?

▪ Ko e heigoa e tau kavega ne tuku he tau loea ke he tau tagata?

▪ Ko e magaaho fe e “fakave he lalolagi”?