Veveheaga 94

Kua Lata ke Liogi mo e ke Mahani Fakatokolalo

HE FAKAMUA, he ha ha a ia i Iutaia, ne talahau e Iesu e tala fakatai hagaao ke he aoga ke fakamakamaka ke he liogi. Ko e magaaho nei, he fenoga fakahiku hana ki Ierusalema, ne liu a ia peehi e lata ke nakai tiaki e liogi. Liga ha ha agaia a Iesu i Samaria po ko Kalilaia he magaaho ne tala age ke he hana tau tutaki e taha tala fakatai foki:

“Ha he taha māga e taha fakafili, kua nakai matakutaku ke he Atua, ti nakai maimaina ke he tau tagata. Ha he māga foki ia e taha fifine takape, ne fano kia ia, kua pehe age, Kia fakafili e koe a ia ha i ai haku a tau mena. Ko e falu a aho nakai maeke ai a ia; ati oti, ka e pehe hifo a ia ke he hana loto, Pete ni he nakai matakutaku au ke he Atua, ti nakai maimaina au ke he tau tagata; ka ko e mena kua fakahoha mai kia au e fifine takape nei, ti fakafili ai e au hana tau mena, neke fakamamahi mai kia au he fa hau mau a ia.”

Ne talahau e Iesu e fakagahuahuaaga he hana tala he pehe: “Kia fanogonogo mai a a mutolu ke he kupu he fakafili mahani hepehepe. Ka e nakai kia fakafili he Atua e tau mena ha lautolu ne fifili e ia, ha ha ne tauui a lautolu kia ia ke he aho mo e po, pete ni he mule mai a ia kia lautolu?”

Ne nakai kakano a Iesu ke pehe kua tatai a Iehova ko e Atua mo e iki fakafili mahani hepehepe ia. Kaeke ke maeke he fakafili mahani hepehepe ia ke tali e tau ole fakamakamaka, kua nakai fai huhu ke he Atua, ne katoatoa e tututonu mo e mitaki, ke tali kaeke ke nakai tiaki he hana tau tagata e liogi. Ti matutaki a Iesu: “Kua tala atu e au kia mutolu, To fakafili vave e ia [Atua] e tau mena ha lautolu.”

Ne nakai taute e fakafili tonu ki a lautolu ne tokolalo mo e nonofogati, ka ko lautolu ne malolo e tau pule mo e tau maukoloa ne fa talia. Ka e taha e mena, ko e Atua, ne nakai ni kikite ke fakahala mo e tonu e tau tagata mahani kelea, ka e kitia foki ko e hana tau fekafekau kua taute e fakafili tonu ki ai he foaki age ki a lautolu e moui tukulagi. Ka e tokologa nakai e tau tagata ne mauokafua ke talitonu to maeke he Atua ke fakaave mai e fakafili tonu?

Ne hagaao pauaki ke he tua he fakatatai atu ke he malolo he liogi, ne huhu a Iesu: “Ka hau e Tama he tagata, mailoga he ha ke moua mai e ia e tua ke he lalolagi?” Pete ni he toka noa e huhu nakai fai tali, ko e talahauaga to liga nakai mahuiga e tua pihia ke he magaaho ka hau a Keriso mo e malolo he Kautu.

Ko e falu ia lautolu ne fanogonogo ki a Iesu ne logona hifo ki a lautolu ni e malolo he ha lautolu a falanaki ke he ha lautolu ni a tua. Ne tua ni a lautolu ke he ha lautolu a tututonu, mo e onoono hifo a lautolu ke he falu. Ha ha i ai e falu he tau tutaki ha Iesu ne putoia ke he vahega nei. Ti fakahagaao e ia e tala fakatai ne mui mai ki a lautolu pihia:

“Ne o hake ke he faituga e tokoua a tagata ke liogi; ko e farasaio taha, ko e telona taha. Ne tu e Farasaio kua liogi fakatekiteki atu ke he tau kupu nai, Ko e Atua na e, kua fakaaue atu au kia koe, he nakai tuga e [falu] tagata au, ko lautolu ne fofo mena, ko e tau matahepehepe, ko e tau faivao, nakai tuga foki e telona ko. Kua fakakanopogi takilagaua au ke he tau fahitapu; kua uta e au e tau mena ne hogofulu aki haku a tau mena oti ka moua.”

Ne mailoga e tau Farasaio ke he ha lautolu a fakatataaga ki mua he tau tagata tokologa ha lautolu a tututonu ke eke mo nava ke he falu. Ko e tau aho ne fa mahani ma e fakakanopogi ha lautolu ko e tau Aho Gofua mo e tau Aho Tuloto, mo e totogi oti e tau mena ne hogofulu aki ti hoko atu ke he tau akau ikiiki he fonua. Ko e tau mahina gahoa fakamua ne fakakite ha lautolu a vihiatia ke he tau tagata noa he Galue he Tau Fale Api he magaaho ne pehe a lautolu: “Ka ko e moto tagata na, nakai iloa e Fakatufono, [ko e fakakakanoaga faka-Farasaio a ia] kua ulaafia ni a lautolu.”

Ne matutaki hana tala fakatai, ne tala a Iesu ke he tagata “ulaafia” pihia: “Ko e telona foki kua tu mamao atu, nakai maeke ke haga hake hana tau mata ke he lagi, ka kua pokipoki hana fatafata, kua pehe age, Ko e Atua na e, kia fakaalofa mai a koe kia au ko e tagata hala.” Ha kua fakatokolalo e telona mo e fakailoa hana tau mena ne kuku ai, ti pehe a Iesu: “Kua tala atu e au kia mutolu, kua hifo e tagata na ke he hana fale kua talahaua tututonu, ka e nakai pihia taha; ha ko ia ne fakatokoluga e ia a ia, to fakatokolalo ai a ia; ka ko ia ke fakatokolalo e ia a ia, to fakamatalahi a ia.”

Kua liu foki a Iesu peehi e lata tonu ke mahani fakatokolalo. Ha kua feaki hake he kaufakalatahaaga ne ha i ai e tau Farasaio fia tututonu ne pule lalahi mo e peehi mau ma e tau tutuaga, nukua nakai ofo ha kua lauia pihia foki e tau tutaki ha Iesu. Ka e, ko e tau fakaakoaga mitaki ha a ia ke he mahani fakatokolalo ne fakaako e Iesu! Luka 18:​1-14; Ioane 7:49.

▪ Ko e ha ne talia he iki fakafili nakai tututonu e ole he takape, mo e ko e heigoa e fakaakoaga he fakataiaga ha Iesu?

▪ Ko e heigoa e tua ka kumi e Iesu ka hoko mai a ia?

▪ Ko e hagaao ki a hai e fakataiaga ha Iesu ke he Farasaio mo e telona?

▪ Ko e heigoa e aga he tau Farasaio ne kua lata ke fakamamao mai ai?