Veveheaga 97

Kau Gahua he Ulu Vine

“KA E tokologa a lautolu ne mumua,” he talahau e Iesu, “ke uta ke fakamui, ko lautolu foki ne fakamui, to mumua a lautolu.” Ko e magaaho nei ne fakamaama e ia e mena nei he talahau e tala. “Ha ko e mena lata e kautu he lagi,” he kamata e ia, “mo e taha patu he magafaoa, ne uhu fano ke vagavagahau mo e falu ke gahua ke he hana ulu vine, to totogi.”

Ne matutaki a Iesu: “Kua vagavagahau [e patu he magafaoa] mo e tau tagata eke gahua, ke taha e aho mo e tenari; ati fakafano atu ai e ia a lautolu ke he hana ulu vine. Ko e magaaho tolu foki kua fina age ai a ia, ti kitia ai e ia e falu kua tutu he male kua nakai gahua. Ati tala age ai a ia kia lautolu, Ati o atu foki a mutolu ke he ulu vine, to ta atu e au kia mutolu e mena kua lata. Ti o ai a lautolu. Ati liu foki fina age a ia ke he magaaho ono, mo e hiva, kua eke pihia foki. Ko e magaaho hogofulu ma taha foki kua fina age ai a ia, ati kitia ai e ia e falu ne tutu kua nakai gahua, kua tala age foki a ia kia lautolu, Ko heigoa e mena ne tutu mai ai a mutolu ki hinai ke he aho oti kua nakai gahua? Kua pehe mai a lautolu kia ia, Nakai tala mai e taha kia mautolu. Kua tala age a ia kia lautolu, Ati o a a mutolu foki ke he ulu vine, to moua e mutolu e mena kua lata.”

Ko e patu he magafaoa, po ko ia e hana ulu vine, ko Iehova ko e Atua, mo e ko e ulu vine ko e motu ko Isaraela. Ko lautolu ne gahua ke he ulu vine, ko e tau tagata ne ta mai ke he maveheaga he Fakatufono; ko lautolu fakamahao he tau Iutaia ne momoui he vaha he tau aposetolo. Ko e maveheaga ni mo lautolu ne gahua ke he aho katoa ke moua e totogi. Ko e totogi ko e tenari ma e taha e aho gahua. Ha ko e “magaaho tolu” ko e matahola 9:00 a.m., ko lautolu ne ui ke he tau matahola ke 3, 6, 9, mo e 11 aki he gahua, kua gahua ni fakalata ke he 9, 6, 3, mo e 1 e matahola.

Ko e kau gahua ne 12 e tula, po ke aho katoa, ko e tau takitaki Iutaia ne kua gahua tumau ke he fekafekauaga fakalotu. Ne nakai tuga e tau tutaki ha Iesu a lautolu, ne laulahi he ha lautolu a tau momoui ne gahua takafaga ika po ke falu a gahua tupe foki. Ato hoko la ke he vaha tau mateafu he 29 V.N. ne fakafano he “patu he magafaoa” a Iesu Keriso ke fakapotopoto mai a lautolu nei mo hana tau tutaki. Ati eke ai a lautolu mo “fakamui,” po ke ko e kau gahua he ulu vine ke 11 e tula.

Ko e fakaotiaga, ko e aho gahua fakatai ne fakahiku ai he mate ha Iesu, mo e magaaho ke totogi e tau tagata gahua. Ko e fakatufono matakehe he totogi mua a lautolu fakamui ne mui mai, tuga kua fakamaama: “Kua hoko ke he afiafi, ati tala age ai e iki hana e ulu vine ke he fekafekau pule hana, Ui a ke he tau eke gahua, ti age e totogi kia lautolu, kia kamata ia lautolu ne fakamui, kia hoko kia lautolu ne mumua. Ti o mai ai a lautolu ne o age ke he magaaho hogofulu ma taha, kua takitaha mo e moua e lautolu e tenari. Ati o mai ai a lautolu ne mumua, piko na lautolu ko e mena mua ha lautolu a totogi; ka kua takitaha foki mo e moua e lautolu e tenari. Kua moua e lautolu, ati loma ai a lautolu ke he patu he magafaoa. Kua pehe mai, Taha ni e magaaho ne gahua ai a lautolu nai ne fakamui, ka kua fakatatai e koe a lautolu mo mautolu, ne uka he gahua to lagina he aho! Ati tala age ai a ia, kua pehe age ke he taha ha lautolu. Teme na e, nakai mahani kelea au kia koe; nakai kia vagahau a taua ke taha e tenari? Ati toto a e mena hāu mo e fano; kua pule au ke age kia ia ne fakamui, ke tuga na koe. Ka e nakai kia lata ke pule au ke he haku a tau mena? ke fakatetefu mai kia a koe he totonu au.” Ke fakaotiaki, ne liu fatiaki e Iesu e mena ne talahau fakamua ne pehe: “To pihia he mumua a lautolu ne fakamui, ka e fakamui foki a lautolu ne mumua.”

Ko e magaaho ne moua e tau tenari, nakai he magaaho ne mate a Iesu, ka ko e Penetekoso 33 V.N., he magaaho he Keriso, “ko e fekafekau pule,” ne liligi hifo e agaga tapu ke he hana tau tutaki. Ko e tau tutaki nei ha Iesu ne tuga e kau gahua “fakamui,” po ke kau gahua ke 11 e matahola. Ko e tau tenari ne nakai ko e mena fakaalofa he agaga tapu. Ko e tenari ko e taha mena ma e tau tutaki ke fakaaoga ke he lalolagi nei. Ko e taha mena ne kakano ai ha lautolu a tau momoui, ko e ha lautolu a momoui tukulagi. Ko e fakamonuinaaga, ko e tau Isaraela fakaagaga, ne fakauku ke fakamatala hagaao ke he Kautu he Atua.

Ne nakai leva ti kitia e lautolu ne mumua to totogi kua fita he totogi e tau tutaki ha Iesu, mo e kitia e lautolu a lautolu ne kua fakaaoga e tau tenari fakatai. Ka e manako atu foki a lautolu, nakai ni ke he agaga tapu mo e falu a monuina foki he Kautu. Ko e ha lautolu a loma mo e tau totoko ne puhala mai he tau eke fakakelea he tau tutaki ha Keriso, ko e kau gahua “fakamui” he ulu vine.

Ko e fakamoliaga he senetenari fakamua ni kia e fakamoliaga he tala fakatai ha Iesu? Nakai, ko e tau akoako he Kerisitenitome he senetenari ke 20 aki nei, ha ko e ha lautolu a tau tutuaga mo e tau gahua, kua “mumua” he gahua totogi ke he ulu vine fakatai he Atua. Ne manatu a lautolu ko e tau tagata tukulele ne fakamatala he Watch Tower Bible and Tract Society e tau tagata ka “fakamui” ke fai kotofaaga aoga ke he fekafekauaga he Atua. Ka ko lautolu, moli nei, ne vihiatia he tau akoako, ne moua e tau tenari​—ko e lilifu he fekafekau ko e tau hukui fakauku he Kautu he Atua he lagi. Mataio 19:​30–​20:16.

▪ Ko e heigoa e kakano he ulu vine? Ko hai ne hukui he patu he magafaoa he ulu vine mo e tau tagata gahua he 12 e matahola mo e 1 e matahola?

▪ Fakaoti he magaaho fe e aho gahua fakatai, mo e taute he magaaho fe e totogi?

▪ Ko e heigoa ne hukui he totogi he tenari?